Астронаутката на НАСА, Џесика Меир, сними неверојатно тајмлапс (time-lapse) видео од јужната светлина – аурора аустралис (аurora аustralis) од внатрешноста на вселенскиот брод Спејс Икс Драгон (SpaceX Dragon). Меир, која моментално служи како командант на вселенската мисија Кру-12 (Crew-12), го сподели реткиот феномен каде зелените светлински бранови буквално „танцуваат“ директно под капсулата, пренесува „Гардијан“.

Уникатна перспектива од вселената

За разлика од вообичаените снимки од орбитата каде поларната светлина се гледа на хоризонтот, оваа силна аурора се протегаше директно под леталото.

„Оваа светлина танцуваше и се движеше како змија директно под нас, приредувајќи ни вистинско шоу. Воодушевена сум од овој етеричен феномен кој буди силни емоции“, напиша Џесика Меир на инстаграм.

 

View this post on Instagram

 

A post shared by Jessica Meir (@astro_jessica)

Снимката е направена додека астронаутите привремено престојувале во капсулата Драгон спејс (Dragon Space), додека во меѓувреме на Меѓународната вселенска станица (МКС) се работело на санирање на мал дефект со истекување воздух.

Науката зад феноменот

Според извештаите на „Би-би-си“, овој интензивен светлосен спектакл е директна последица на неодамнешна силна соларна активност. Процесот се одвива на следниот начин:

– Сончев ветер: Сонцето испушта огромно количество наелектризирани честички кон Земјата.
– Магнетно поле: Магнетното поле на нашата планета ги насочува овие честички кон поларните региони (Северниот и Јужниот пол).
– Судир во атмосферата: Кога честичките ќе се судрат со гасовите во горниот слој на атмосферата, тие ослободуваат енергија во форма на прекрасни зелени и црвени светлечки бранови.

Зошто аурора аустралис е реткост за луѓето?

Аурора аустралис (аurora аustralis) се случува еднакво често како и нејзиниот северен пандан аурора бореалис (аurora Borealis). Сепак, таа многу поретко се снима од Земјата бидејќи главно се појавува над Антарктикот и огромните пространства на Јужниот Океан, каде што нема постојана човечка населеност. Токму затоа, снимките од Меѓународната вселенска станица и капсулите на Спејс Икс се од огромно значење за научниците кои го проучуваат вселенското време.