Новинарката Вики Чадиковска откри приказна за Перо Антиќ и за Владимир Блажев – Панчо од „ДНК“ која е помалку позната во јавноста.

Откако вчера, легендарниот кошаркар и претседател на Кошаркарската федерација на Македонија го испрати на полуматура Андреја, постариот син на Панчо кој почина на 14 октомври лани, приказна за Антиќ и за Панчо сподели Вики Чадиковска.

„Син ми е роден во јули, на истиот ден како Панчо и Перо Антиќ. Пред неколку години, бидејќи беше голем обожавател на ДНК, ги замолив да му приредат мало роденденско изненадување. Панчо и Андреј без ниеден момент двоумење, прифатија. Такви беа тие, едноставни и прекрасни луѓе, секогаш подготвени да измамат насмевка и да направат некого среќен.

Истото човештво и големина деновиве ги покажа и Перо, со поддршката што му ја даде на синот на Панчо за полуматура.

Ова го пишувам искрено револтирана од коментарите на луѓе кои, наместо да препознаат добрина и човечност, избираат да шират омраза и навреди дури и под објави што носат искрена поддршка и љубов.

Понекогаш навистина нема потреба да се коментира. Особено ако вашиот коментар е злобен. Понекогаш е доволно да се покаже малку почит, емпатија и само малку човечност.

Наместо хејт, пробајте да направите добро дело. За промена. На сите ни недостига повеќе добрина, а токму таа е енергијата што ѝ е најпотребна на оваа наша напатена Македонија.

За Перо голем аплауз, за синот на Панчо честитки за полуматура и многу љубов“, сподели Чадиковска.

Перо Антиќ е роден на 29 јули во 1982 година, а Панчо на истиот ден во 1979.

Антиќ и Панчо беа долгогодишни и многу блиски пријатели. Затоа, неговото присуство на полуматурата на синот на музичарот има посебна симболика.

Панчо беше татко на два сина, Андреја и Марјан, за кои секогаш зборуваше со многу љубов и гордост. За нив сега посветено се грижи неговата сопруга Маја.

Во едно интервју од 2023 година тој откри дека неговите деца се скромни, дружељубиви и воспитани, додавајќи дека постариот син Андреја сака спорт и тренира фудбал.

По вчерашната полуматура на Андреја и негативните коментари, и Перо Антиќ се огласи на Инстаграм и сподели мудра мисла.

„Бидејќи сè што е винтиџ повторно е во мода, можеме ли да ги вратиме и лојалноста, манирите, почитта и благодарноста?“, напиша Антиќ.

ФОТО+ВИДЕО | Перо Антиќ го испрати синот на Панчо на полуматура: „Среќна матура лепотану“