Мајкл Џексон некогаш како милениче поседувал шимпанзо по име Баблс, кое било едно од многуте животни што живееле на неговиот ранч Неверленд. Пејачот, кој почина во 2009 година, го добил шимпанзото во текот на осумдесеттите години од минатиот век од истражувачки центар во американската сојузна држава Тексас. Подоцна почнал да го носи со себе и на турнеи, пишува „Ледбајбл“.

Џексон го добил Баблс во 1983 година и живеел со него во семејниот дом во Лос Анџелес. Кога во 1988 година се преселил во Неверленд, го повел и шимпанзото со себе.

Иако Баблс стекнал голема популарност и се сретнувал со бројни познати личности, со текот на времето станал преголем за живот во дом во кој престојувале и малите деца на Џексон. Поради тоа, во 2003 година бил сместен кај Боб Дан, тренер за животни кој му помогнал на пејачот да го добие шимпанзото од истражувачкиот центар.

Баблс живеел кај Дан неколку години, но како што откри „УНИЛАД“, во 2005 година бил префрлен во Центарот за големи човеколики мајмуни во американската сојузна држава Флорида.

Како живее денес?

Според информациите од центарот, Баблс сè уште е жив и денес има 43 години. Тој ужива во мирната средина што му ја обезбедува засолништето. Живее со 53-годишна женка по име Упси, нејзината 40-годишна ќерка Бома, 23-годишната внука Кодуа и 21-годишниот внук Страјкер.

Според вработените, Баблс многу брзо презел заштитничка и татковска улога кон Кодуа и Страјкер, па денес функционираат како цврсто поврзано семејство. Неодамна во нивната група биле вклучени и три помлади шимпанза, а Баблс е опишан како исклучително трпелив и грижлив кон нив.

Дали сè уште ја слуша музиката на Мајкл Џексон?

Да. Вработените во центарот повремено пуштаат музика од Мајкл Џексон додека ги чистат живеалиштата на животните, па Баблс и денес одвреме-навреме ги слуша песните на својот поранешен сопственик.

Поголем дел од денот го поминува спиејќи во својата лежалка или одморајќи се во омиленото место по сенка. Кога е буден, особено ужива да разгледува списанија со фотографии, а најмногу ги сака изданијата на списанието „Национална географија“.

Познати случки од неговиот живот

Во текот на годините Баблс бил дел од повеќе необични приказни. Како што пишува „Пипл“ тој присуствувал на забава во хотелска соба со рок-пејачот Џон Бон Џови. Можно е извесен период да посетувал училиште заедно со актерката Рајли Кио и во една прилика ја каснал актерката Рашида Џонс.

Баблс се појавува и во поновиот биографски филм посветен на животот на Мајкл Џексон. Наместо да користат вистинско шимпанзо за снимањето, авторите одлучиле ликот на Баблс да биде создаден со помош на компјутерски визуелни ефекти.

Вистинската причина поради која Мајкл Џексон секогаш ја носеше својата препознатлива бела ракавица