Белата светкава ракавица што Мајкл Џексон ја носеше со години стана еден од најпрепознатливите симболи во историјата на поп-музиката, а нејзиното значење било многу поголемо од обичен моден додаток. Според актерката Сисели Тајсон, ракавицата првично била создадена за да ги прикрие првите видливи знаци на витилиго на неговата рака, но со текот на времето прераснала во заштитен знак на пејачот и неодвоив дел од неговиот уникатен сценски имиџ, пренесува „Лед бајбл“.

Пред само еден месец беше објавено дека легендарната ракавица ќе биде понудена на аукција и се очекува да достигне висока цена меѓу колекционерите и обожавателите.

Пејачот во текот на животот многу страдаше поради ова заболување на кожата. Како што постепено се губеше пигментацијата на неговата кожа и таа стануваше сè посветла, токму оваа состојба ненамерно придонесе за создавање на еден од неговите најпрепознатливи заштитни знаци.

Првите симптоми на витилигото, кои предизвикуваат појава на бели дамки на кожата, најнапред се појавиле на неговата рака. Поради тоа, Џексон одлучил да ја покрива со бела светкава ракавица, која од 1983 година натаму стана неизоставен дел од неговите настапи.

И покрај бројните сензационалистички медиумски извештаи во тоа време, во кои се тврдеше дека намерно ја избелува кожата за да изгледа побел, актерката Сисели Тајсон објасни дека ракавицата всушност служела за прикривање на последиците од витилигото. Таа носеше една ракавица како почит кон Џексон за време на неговата комеморација.

Актерката и Џексон соработувале со ист моден дизајнер. Таа раскажа:

„Одеднаш ми рече: ‘Му изработувам ракавица на Мајкл’. Во тоа време Мајкл почна да развива витилиго и болеста најпрво се појави на неговата рака.

‘Ракавицата беше направена за да го прикрие тоа. Така настана таа ракавица.’“

Сисели Тајсон, која почина во 2021 година на 96-годишна возраст, имала можност лично да присуствува кога се создавал овој моден додаток. Сепак, веројатно ни таа не можела да претпостави колку значајна и препознатлива ќе стане ракавицата во имиџот на Џексон.

Во текот на животот Џексон направил повеќе хируршки зафати, меѓу кои и обемни корекции на носот и лицето. Но, очигледно е дека особено тешко се справувал со предрасудите и шпекулациите поврзани со неговото заболување на кожата.

Во едно интервју во деведесеттите години, Опра Винфри го праша за промената на бојата на неговата кожа:

„Бојата на вашата кожа очигледно е различна од онаа кога бевте помлад… Дали вашата кожа е посветла затоа што не сакате да бидете црнец?“

Мајкл Џексон одговори:

„Ситуацијата е следна: имам заболување на кожата кое ја уништува нејзината пигментација. Тоа е нешто на што не можам да влијаам, во ред?

Но кога луѓето измислуваат приказни дека не сакам да бидам тоа што сум, тоа ме повредува… Тоа е проблем за мене. Не можам да го контролирам.“