Корисници ширум светот денеска се соочија со проблеми при користењето на социјалните мрежи „Инстаграм“ и „Фејсбук“, откако двете платформи престанаа да функционираат нормално во попладневните часови.

Според податоците на платформата „Даун Детектор“, прекинот започнал околу 15.36 часот по македонско време, а за кратко време биле регистрирани повеќе од 3.000 пријави од корисници.

Најголем дел од корисниците на „Инстаграм“, односно 68 проценти од оние што пријавиле проблем, навеле дека апликацијата не работи правилно. Дополнителни 12 проценти изјавиле дека не можат да се најават на своите профили, додека 10 проценти се пожалиле на проблеми со поврзувањето со серверите.

Проблемите не ги зафатија само мобилните апликации. Корисниците кои се обидувале да пристапат до платформите преку компјутер добивале порака дека страницата не е достапна.

Во меѓувреме, стотици корисници своето незадоволство и коментари ги споделија на социјалната мрежа „Икс“, каде што брзо почнаа да се шират објави за прекинот на работата на „Инстаграм“ и „Фејсбук“.

Засега нема официјално соопштение од компанијата „Мета“ за причините за прекинот, ниту пак е познато кога услугите ќе бидат целосно нормализирани.

Воајеризам или слобода? Конечно можеме анонимно да ги гледаме „приказните“ на Инстаграм