По лавината реакции на социјалните мрежи, кучето за кое ЈП Лајка Скопје објави апел за вдомување со името Том се врати дома.

Сопственикот на миленикот, Мики Филиповски во изјава за Слободен печат ни објасни дека кучето, мешавина од Стафорд и Пит Бул, во моментов уживо прошетка низ скопската населба Усје од каде што заради петардите избега на новогодишната ноќ.

„Нашето куче се вика Пабло. Ни избега од дворот на нашата куќа во близина на Усје за време на новогодишната ноќ од страв од петардите. Тој уште од мал има уплав од петарди. Секогаш кога ќе слушне експлозија од петарда се плаши. Ние веднаш споделивме дека го бараме по сите Фејсбук групи дека го бараме. Споделија и многу организации. Шепасти ентузијасти и Анима мунди го споделија нашиот апел за помош“ раскажа Мики.

Но, во моментот кога преку социјалната мрежа семејството Филиповски добиле информација каде се наоѓа нивниот миленик што го чувале од бебе следела вистинска голгота.

„Кога добивме информација дека нашето куче е најдено во населбата Аеродром татко ми веднаш отиде да го земе. Но, кога пристигна таму полицијата го спречи да си го земеме дома. Полицајците во тој момент му кажаа дека мора да повикаат некој од вработените во Лајка за да се провери дали ние сме вистинските сопственици и дали кучето е болно од лишманија“ рече Мики во изјава за Слободен печат.

Новинарите на Слободен печат уште од вчера се обидуваа да добијат изјава од ЈП Лајка Скопје, меѓутоа нивните телефонски линии беа во прекин. Од Лајка ја искористија социјалната мрежа за да се обратат до јавноста.

Дури денес,  успеавме да добиеме куса изјава од жена која ни се представи дека е сметководителка и е нова вработена.

Се отвори Лајка, во 50 боксови треба да згрижи 1970 бездомни кучиња (ГАЛЕРИЈА)

„Денес никој тука не работи, јас сум нова вработена тука и викендов сум тука како помош. Лајка не работи за викенди и немам никаква информација“ рече жената, иако веќе и кажавме дека имаме информација дека сопствениците на миленикот се повикани да дојдат во просториите на јавното претпријатие за чија изградба дваесет градежни фирми донираа околу 30 милиони денари.

Мики и неговата сестра Даниела денес по бројните коментари на социјалните мрежи добија повик да дојдат во Лајка. Даниела на  Фејсбук го сподели видеото од моментот на среќа кога Пабло, кастриран, ги виде по скоро еден месец.

„Во моментот кога Пабло влезе во неговиот двор, тој веднаш си влезе во неговата куќарка. Никогаш нема да го заборавам овој момент, тој знаеше дека е дома. “ рече Мики за Слободен печат.

Тој нагласи дека петардите покрај тоа што може да причинат фатални последици за луѓето, за домашните миленици се стрес кој остава трајни последици. Мики исто така нагласи дека многу од сопствениците на домашни миленици воопшто не се свесни за законите и обврските кои се обврзани да ги извршуваат.

Годишно 5.000 кучиња и мачки умираат од стресот предизвикан од петардите и огнометот

„Иако Пабло го чувавме од бебенце и се грижевме да го раниме добро, да го социјализираме и да има соодветна здравствена грижа од ветеринар, да ги прими сите потребни вакцини. Сепак со законите почнавме да се запознаваме дури која полицијата почна да ни цитира членови од закони. Ние толку многу го сакаме и толку многу го чувавме Пабло, но не знаевме дека мора да му ставиме чип. Откако се исплаши Пабло и ни избега поминавме низ вистинска голгота за да го вратиме дома“ рече Мики за Слободен печат.

Директорката на „Лајка“ ги отфрли обвинувањата кои кружеа во јавноста за недомаќинско работење