Во Рим за првпат се појавија апарати за пица кои го подготвуваат ова традиционално италијанско јадење за само три минути. Италијаните беа шокирани од овие апарати кои се косат со традиционалното и долгогодишно подготвување на највкусните видови на пица, јавува nypost.com

Купувачите на апаратите под назив „Mr. Go Pizza“ можат да изберат меѓу четири видови пица кои чинат од 4,50 до 6 евра.

Машината го меси тестото и го додава филот, а купувачите сето тоа можат да го гледаат преку малото стаклено прозорче.

Купувачите во Рим различно реагираа на оваа иновација со коментари дека сепак е „прифатливо доколку навистина брзате“.

„Помала е од пицата во рестораните, а има и помалку фил“, изјави еден пензионер.

„Супер брза пица за која не треба да чекам половина час и за евтини пари“, нагласи една тинејџерка.

Луѓето многу одамна јадат различни облици на леб и тесто со фил, но општо прифатено е дека пицата како специјалитет е усовршена во Наполи, каде долго време најпрвин била улична храна за сиромашните.