Денеска во првиот натпревар од четвртфиналето во СЕХА лигата составот на Е. Пелистер во Битола загуби од Мешков Брест со 27:31.

Во ниту еден момент од мечот во салата „Боро Чурлевски“ македонскиот вицешампион не беше во водство, од првата до последната минута Белорусите го контролираа резултатот во своја корист.

На стартот единствено играчите на Жељко Бабиќ двапати ремизираа на 1:1 и 2:2, па неколку пати намалуваа на „минус еден“ (3:4, 5:6).

Следуваше серија на гостите од 4:1, во 24 минута за 6:10 се погрижи Санталов. Пред паузата ривалите достигнаа и највисоки 8:13, а пред паузата намали Божиќ-Павлетиќ.

Ништо не се промени во вториот дел, растеше позитивата на Мешков кој и пред мечот ја имаше фаворитската улога и истата ја оправда. Најголемата негатива Е. Пелистер ја имаше во 46 минута (16:24) и 47 минута (17:25), по што дилемите беа решени кој ќе биде победникот на овие први 60 минути од четвртфиналниот двомеч.

До крајот на средбата домашните ракометари се потрудија само да го ублажат поразот, во што успеаја, и на крајот загубија со достојни четири голови разлика (27:31), што секако остава и натаму шанси битолчани да се надеваат дека можат да направат целосен пресврт на реваншот и се изборат за свое прво учество на Ф4 турнирот во регионалното натпреварување.

Мандалиниќ беше најефикасен во девет голови за Е. Пелистер, три помалку запиша Периќ, а на спротивната страна Кашпарек имаше осум, а Ваилупау шест погодоци. Реваншот во Белорусија ќе се одигра на 29 август.