Ракометарите на Вардар 1961 со триумфот над Охрид со 29:22 во македонската Суперлига остануваат во игра за шампионската титула.

После првото полувреме играчите предводени од тренерот Владо Недановски водеа со четири голови разлика (15:11).

Во победничките редови Петриќ осум пати се запиша во листата на стрелците, а на спротивната страна Цисар запиша шест погодоци.

На едно коло до крајот на сезоната, водечки е актуелниот шампион Еурофарм Пелистер со 38 бодови, два повеќе од Вардар на второто месот со 36.

На 2 јуни Еурофарм Пелистер во Битола ќе го пречека Алкалоид кој сигурно завршува како трет во првенството, додека Вардар ќе му гостува на Бутел.

Скопските „црвено-црни“ ќе мора да одат на победа против Бутел, но и се надеваат на пораз на Еурофарм Пелистер на кој ќе му биде доволен и бод против Алкалоид да ја одбрани титулата.

Потсетување дека во финалето од Купот на Македонија составот на Алкалоид пред шест дена во СЦ „Борис Трајковски“ го совлада Еурофарм Пелистер.