Ракометниот клуб Вардар 1961 не успеа преку квалификациската рунда да се најде во групите на ЕХФ Европската лига за новата сезона 2023/2024.

Сите дилеми околу двомечот против Рајн Некар Левен беа решени уште во првиот натпревар кога Германците триумфираа во СЦ „Јане Сандански“ со 25:34.

И на денешниот реванш скопските „црвено-црни“ беа поразени, но овој со помала разлика од 37:33 и достојно се простија од меѓународната ракометна сцена оваа сезона.

Играчите на Владо Недановски во текот на првото полувреме неколку пати имаа и предност од два голови разлика (7:5, 8:6). Водеа и на стартот од вториот дел со 18:17, а оттогаш па до самиот крај на дуелот домаќините константно ја одржуваа својата позитива и запишаа уште еден триумф против македонскиот претставник.

Најефикасен во редовите на Вардар во реваншот беше Лазаревски со седум голови, по шест имаат Јагуриновски и Петриќ.

Рајн Некар Левен во новата сезона од ЕХФ Европската лига ќе игра во групата „А“ против Нант (Франција), Кристијанштад (Шведска) и Бенфика (Португалија). Потсетување дека во јули нашиот репрезентативец Филип Талески потпиша за Бенфика доаѓајќи токму од редовите на РК Вардар 1961.