Полската тенисерка Ига Швјонтек е нова шампионка на УС опен откако во големото финале ја совлада Онс Жабер во двата сета со 6:2,7:6. Ова е трета гренд слем титула за Швјонтек, претходните две ги освои на Ролан Гарос и го зацементира статусот на најдобра тенисерка на светот.

Жабер пак, дожвеа пораз и во второто гренд слем финале, претходно загуби на Вимблдон од Елена Рибакина.

Швјонтек одлично го започна финалето на УС опен, го одзеде првиот сервис на Жабер и поведе со 3:0 во гемови. Тунижанката возврати во петтиот гем кога намали на 3:2, но веќе нба следниот сервис, Швјонтек повторно прави брејк за 4:2, а сетот го заврши со уште еден брејк за 6:2.

Во вториот сет, Жабер прикажа подобра игра иако повторно го загуби првиот сервис и повторно во петтиот гем дојде до брејк. Во следните два гема, тенисерките направија два брејка за потоа Жабер во осмиот гем да биде сигурна на свој сервис за 4:4. Во наредните четири гема, Швјонтек и Жабер беа сигурни на свој сервис и сетот го однесоа во тај-брејк.

Тај-брејкот започна со четири мини брејка, а потоа Жабер поведе со 4:5, но ги загуби поените на свој сервис по што Швјонтек дојде до 7:5 и титулата на УС опен.