Тупурковски го доби наследникот: Даниел Димевски нов претседател на МОК
Поранешниот претседател на Кошаркарската федерација на Македонија (КФМ), Даниел Димевски, денеска е избран за нов претседател на Македонскиот олимписки комитет (МОК).
Случувањата на Собранието на МОК не поминаа глатко, противкандидатката на Димевски, Александра Војнеска – Зикова заедно со своите приврзаници укажаа на бројни нерегуларности, а откако не ја добија поддршката од повеќето членови, ја напуштија салата.
Војнеска – Зикова и привзаниците го напуштија Собранието на МОК
Во отсуство на противкандидат, Даниел Димевски на тајното гласање доби 30 гласа и беше избран за претседател на МОК и ќе го наследи Васил Тупурковски, кој до денеска беше единствениот претседател на Македонскиот олимписки комитет. Тупурковски едногласно беше избран за почесен претседател на МОК. Интересно е што Војнеска – Зикова иако не остана на гласањето, доби еден глас, а едно ливче беше неважечко.
Веднаш по изборот Димевски најави дека идната година повторно ќе организира Изборно Собрание.
– Уште сега ветувам, јавно кажувам дека следната година ќе организираме ново Изборно Собрание, па тие пак нека не дојдат. Сакам да бидеме обединети, а не разделени. Затоа ќе сторам се за бидеме пак сите заедно. А до следниот избор зад себе ќе имам една година во која ќе работам напорно и ќе дадам се од себе за македонскиот спорт. Вечерва ми е еден од најтешките денови. Имав три мандати во КФМ и секој пат сум давал се од себе на сите што мислат различно да ги убедам да мислат вистински. Оваа ситуација ќе ме мотивира да работам уште понапорно и сите овие столчиња сега што се празни ке бидат полни и ќе ми аплаудираат повеќе од сите вас – изјави Димевски.