Претседателот на Соединетите Американски Држави, Доналд Трамп, ги повика своите приврзаници да ги бојкотираат концертите на американскиот музичар Брус Спрингстин, кој е отворен критичар на политиката на актуелната американска администрација, пренесува „Еуроњуз“.

Трамп во објава на својата социјална мрежа Трут Соушл наведе дека Спрингстин „шири омраза против претседателот кој убедливо победи на изборите“.

„Под Успаниот Џо и демократите, нашата земја беше мртва, а сега имаме далеку ‘најжешка’ земја, било каде во светот. МАГА треба да ги бојкотира неговите прескапи концерти, кои се лоши. Заштедете ги своите тешко заработени пари. Америка се врати“, порача Трамп.

Трамп го нарече Спрингстин „целосен губитник“ кој „шири омраза“ кон претседателот кој „убедливо победи на изборите, вклучувајќи ги гласовите на народот, сите седум променливи држави и 86 окрузи низ Америка“.

„Лош и многу досаден пејач, Брус Спрингстин, кој изгледа како сушена слива што многу страдала од работа со навистина лош пластичен хирург, долго време имаше ужасен и неизлечив синдром на пореметување поради Трамп, понекогаш наречен ТДС“, истакна американскиот лидер.

ТДС е политички обоена навреда која Трамп и неговата администрација често ја користат против критичарите, термин кој го карактеризира противењето на претседателот како психолошко пореметување.

Несогласувањето помеѓу Трамп и Спрингстин започнува во 2018 година, кога рок музичарот го искористи својот настап „Спрингстин на Бродвеј“ за да протестира против имиграционата политика на Трамп, која одделуваше деца од нивните родители без документи.

Минатиот мај, Трамп го нарече Спрингстин „преценет“, откако пејачот го спореди неговото претседателство со „авторитаризам“ за време на европската турнеја.

Спрингстин на 28 март на протестниот собир „Без кралеви“ во Сент Пол, Минесота, го изведе својот хит „Улиците на Минеаполис“, кој ја осудува антиимиграциската политика.