Американската манекенка и телевизиска водителка Тајра Бенкс поднесе тужба против Нетфликс, тврдејќи дека документарната серија „Проверка на реалноста: Внатре во Следниот топ-модел на Америка“ е монтирана на начин што создава лажен и клеветнички наратив за неа, пренесува „АП“.

Според тужбата поднесена пред федерален суд во Лос Анџелес, Бенкс дала интервју во траење од три и пол часа за потребите на документарецот, но во конечната верзија биле искористени само 16 минути. Таа тврди дека нејзините изјави биле извадени од контекст и селективно монтирани за да поддржат приказна што не одговара на она што навистина го кажала.

Нејзините адвокати наведуваат дека од документарецот биле отстранети деловите во кои таа презема одговорност за некои од контроверзните моменти и одлуки поврзани со реалното шоу „Следниот топ-модел на Америка“. Според нив, токму тие изјави биле важни за гледачите да добијат целосна слика за нејзиниот став кон критиките што шоуто ги добиваше со години.

Тужбата е насочена против Нетфликс, режисерите Даниел Сиван и Мор Луши, како и против продукциското студио кое стои зад проектот. Бенкс бара финансиска отштета, но и забрана за користење на нејзиниот лик во врска со музичкиот албум објавен како придружен материјал на документарната серија.

Особено спорен дел од документарецот, според тужбата, е начинот на кој е претставено прашањето за наводен сексуален напад врз една натпреварувачка. Бенкс тврди дека никогаш не ѝ било поставено такво прашање за време на интервјуто, но монтажата создала впечаток дека знаела за темата, се обидувала да ја избегне и не сакала да даде одговор.

Во тужбата се наведува и дека не ѝ било дозволено да го погледне документарецот пред неговото објавување, дека не била контактирана за проверка на фактите и дека не добила можност да одговори на обвинувањата изнесени од други учесници во серијата. По емитувањето, како што тврди, се соочила со силни негативни реакции од јавноста и со штета врз нејзиниот углед.

„Следниот топ-модел на Америка“ започна во 2003 година и во текот на 24 сезони беше едно од најгледаните реални телевизиски шоуа во светот. Во последните години повторно се најде под критики поради обвинувања за понижување на натпреварувачките, спорни предизвици и проблематични продукциски одлуки, за кои Бенкс претходно призна дека дел од нив биле грешки и лоши проценки.

Тајра Бенкс за ревијата на „Викторија сикрет“: Само се надевав дека нема да ми излезат градите