Во рамките на 28. Шангајски интернационален филмски фестивал, во Филм Арт центар во Шангај, на 14 јуни 2026 година премиерно беше прикажан дебитантскиот долгометражен документарен филм „Руини“ на Елена Чемерска.

– Проекцијата се одржа пред преполна сала и беше проследена со разговор со публиката, која со голем интерес ги сподели своите впечатоци за филмот. По проекцијата следеше средба со бројните посетители, кои ги поздравија авторите со долги аплаузи и интерес за фотографирање и автограми – објави продукцијата на официјалниот инстаграм-профил.

Документарниот филм е во режија на Елена Чемерска, а продуценти се Иван Унковски, Ивана Шекуткоска и Елена Чемерска. Копродуценти се Оливер Сертиќ и Ивана Нацева, а извршен продуцент е Атанас Георгиев.

Кинематографијата е на Ѓорѓи Клинчаров и Марина Колоска, монтажата на Владимир Гојун и Горјан Атанасов. Композитор е Игор Василев Новоградска, дизајнер на звук на Лука Гамулин.

Филмот е за реставрацијата на „Споменикот на слободата во Кочани“, монументално дело на таткото на Елена Чемерска, големиот уметник Глигор Чемерски и архитектот Радован Раѓеновиќ.

Филмот е реализиран со поддршка од Агенцијата за филм на Република Северна Македонија, Хрватскиот аудиовизуелен центар, РТВ Словенија и во рамки на проектот „Култура за развој” на Владата на Швајцарија, имплементиран од „Хартефакт Фонд“.

„Руини” е копродукција помеѓу „Синема Футура“ и „Минимал колектив“ од Македонија, „Рестарт“ од Хрватска и Потем од Словенија, во соработка со „Флимтрик“.