Две возила се запалени пред амбасада на Република Бугарија во центарот на Скопје. Неофицијално, возилата се намерно запалени, а полицијата трага по сторителот.

Од скопската Противпожарна бригада за „360 степени“ изјавија дека по брзата интервенција огнот е изгаснат.

„Опожарени се две патнички возила. Интевенираа тројца пожарникари со едно противпожарно возило“, изјавил Звонко Томевски, командант на скопската Противпожарна бригада.

Тој додаде дека се изгорени главно во делот на моторот и нема предизвикано штета на околните објекти.

Според првичните информации напаѓачот полил и запалил едно возило „сузуки витара“ по што огнот зафатил и друго возило паркирано во непосредна близина. Од фотографиите што „360 степени“ ги направи на терен може да се види дека станува збор за возила со дипломатски регистарски таблички.

На коловозот има траги од гаснењето на пожарот.

По палењето лицето избегало од местото на настанот. Полициски екипи го обезбедуваат просторот пред амбасадата додека други единици преземаат мерки за пронаоѓање на потпалувачот. Нема информации за повредени лица.

Инцидентот се случува во моменти на тензична атмосфера меѓу Македонија и Бугарија.