Историски рекорд — Мистер Бист е првиот јутјубер во светот со 500 милиони претплатници
Џими Доналдсон, попознат како Мистер Бист, испиша нова страница во историјата на интернетот откако стана првиот поединечен креатор на содржини што достигнал 500 милиони претплатници на Јутјуб.
Препорачано
-
1
-
2
-
3
По повод овој историски успех, тој на својот профил на Инстаграм објави фотографии на кои позира покрај специјалното признание што го добил од Јутјуб, како и покрај сите награди што ги освоил во текот на својата кариера. Илјадници следбеници и обожаватели од целиот свет му упатија честитки за достигнувањето.
Овој успех претставува уште еден голем чекор во кариерата на човекот кој од тинејџер што снимал видеа во својата соба прерасна во највлијателниот креатор на содржини на интернет.
View this post on Instagram
Од скромни почетоци до светска слава
Мистер Бист го отвори својот прв канал во 2012 година, кога имал само 13 години. Во почетокот објавувал видеа поврзани со видеоигри, анализи на заработката на други јутјубери и коментари за различни интернет-содржини. Неговите видеа тогаш привлекувале релативно мал број прегледи.
Пресвртот се случил во 2017 година кога објавил видео во кое брои до 100.000 прегледи. Иако снимањето траело десетици часови, видеото станало огромен интернет-хит и му донело милиони нови гледачи. По овој успех следувале бројни необични предизвици што дополнително ја зголемиле неговата популарност.
Филантропија како заштитен знак
Во периодот од 2018 до 2019 година, Мистер Бист почнал да го менува концептот на своите видеа. Наместо содржини базирани само на предизвици, започнал да донира големи суми пари на бездомници, случајни минувачи и креатори на содржини.
Неговото видео во кое донира 10.000 долари на бездомник го означи почетокот на новото поглавје во неговата кариера, засновано на хуманитарни акции и помош за луѓето.
Во 2019 година ја започна глобалната акција „Тим дрвја“, преку која беа собрани повеќе од 25 милиони долари за садење над 25 милиони дрвја. Подоцна следуваше и акцијата „Тим мориња“, со која беа собрани повеќе од 30 милиони долари за чистење отпад од плажите, реките и океаните.
Ера на спектакуларни продукции
Со растот на популарноста, буџетите за неговите видеа достигнаа размери споредливи со големи телевизиски и филмски продукции. Тој подаруваше автомобили, куќи, приватни острови и организираше натпревари со огромни парични награди.
Еден од најзначајните моменти во неговата кариера беше видеото „Игра со лигњи во реалноста вредна 456.000 долари!“, кое се приближува до една милијарда прегледи и претставува пресвртна точка за неговиот канал.
Особено внимание привлекоа и неговите масовни натпревари како „50 јутјубери се борат за 1.000.000 долари“ и „50 стримери се борат за 1.000.000 долари“, кои поставија нови стандарди во создавањето интернет-содржини.
Од јутјубер до глобален претприемач
Во следните години Мистер Бист се етаблираше и како успешен претприемач. Покрај развојот на своите медиумски проекти, тој создаде и повеќе успешни деловни потфати, а неговите видеа беа адаптирани на бројни јазици со цел да допрат до публика ширум светот.
Во 2022 година стана поединечен креатор со најголем број претплатници на Јутјуб, а во 2024 година неговиот канал стана најследениот канал на платформата, престигнувајќи ги сите конкуренти.
Границата од половина милијарда
Во последниот период неговата популарност продолжи да расте благодарение на сè поголемите проекти, хуманитарни акции и продукциски потфати. Помошта за сиромашни семејства, изградбата на бунари во Африка и бројните донации дополнително го зацврстија неговиот углед кај публиката.
Со достигнувањето од 500 милиони претплатници, Мистер Бист официјално стана првиот поединечен креатор на содржини во историјата што ја достигнал оваа бројка, потврдувајќи го својот статус како највлијателна фигура во светот на интернет-содржините.
