Mакедонија влегува во период на интензивни инвестиции во експресната патна мрежа, најави вицепремиерот и министер за транспорт, Александар Николоски, во гостувањето во Дневникот на ТВ Сител. Освен почетокот на изградбата на експресниот пат Куманово-Страцин како дел од „Планот за раст“, Николоски посочи и дека ќе биде распишан  нов тендер за изработка на студии за изградба на експресен пат Кочани-Виница-Делчево, како и за експресен пат Радовиш-Струмица.

„Експресниот пат Куманово -Страцин е дел од ‘Планот за раст’ со Европската Унија, ќе има и ИПА компонента, така што очекувам до следната година заедно со Европската Унија да ги завршиме сите документи и да почне и таму да се гради. Добро е што таму експропријацијата е завршена, одиме на проектирање и на изградба”, изјави Николоски.

Во однос на плановите за изградба на нови експресни патишта, тој најави дека во соработка со директорот на ЈПДП, Коце Трајановски, ќе објават тендер за сите потребни студии за експресен пат кој ќе оди Кочани-Виница-Делчево, а за скоро време, како што рече, ќе излезе и за експресниот пат Радовиш-Струмица.

Според Николоски, овие проекти покажуваат дека државата не инвестира само во автопатски делници, туку паралелно работи и на развој на современа мрежа на експресни патишта, која ќе обезбеди побрзо и побезбедно поврзување на регионите.

„Тоа значи дека сериозно ќе се инвестира покрај во Централна и Западна Македонија и во Источна Македонија“, истакна Николоски.

Целта на најавените проекти, додаде министерот, е подобрување на регионалната поврзаност, забрзување на транспортот на луѓе и стоки и создавање подобри услови за економски развој во сите делови на земјата.

Првите километри од автопатот Прилеп-Битола ќе бидат готови следната пролет, тврди Николоски