Вообичаените конзерванси што се користат за зачувување на храната и продолжување на рокот на траење може да бидат поврзани со зголемен ризик од неколку видови рак и дијабетес тип 2, покажуваат две нови студии од Франција. Станува збор за први истражувања од таков вид во светот кои ја испитале улогата на конзервансите во развојот на овие болести.

„Ова се исклучително важни резултати за конзервансите кои широко се користат не само на францускиот и европскиот пазар, туку и во Соединетите Американски Држави“, рекла Матилда Тувие, главен истражувач на студијата „НутриНет-Санте“ (NutriNet-Santé), која беше користена во истражувањето, пренесува „Си-ен-ен“.

Поврзаност на конзервансите и ракот

Студијата за рак, објавена во списанието „БМЈ“ (BMJ), анализирала 105.000 луѓе во период од 14 години и го испитувала влијанието на 58 конзерванси.

Анализата покажала дека шест конзерванси, меѓу кои натриум-нитрит, калиум-нитрат, сорбати, калиум-метабисулфит, ацетати и оцетна киселина, се поврзани со зголемен ризик од рак.

– Натриум нитрит (сланина, шунка): +32 отсто ризик од рак на простата
– Калиум нитрат: +22 отсто ризик од рак на дојка
– Калиум сорбат (вино, леб, сирење): +26 отсто ризик од рак на дојка
– Калиум метабисулфит (вино): +20 отсто ризик од рак на дојка
– Ацетати: +25 отсто ризик од рак на дојка
– Оцетна киселина: +15 отсто ризик од рак воопшто

Студијата открила дека два антиоксидантни конзерванси, натриум ериторбат и други ериторбати, се поврзани со 21 отсто поголема инциденца на рак на дојка.

„Хипотезата е дека кога ќе изолирате супстанција од нејзината оригинална матрица, како овошје или зеленчук, ефектот врз нашето здравје може да биде различен“, објаснила Тувие.

Ризик од дијабетес тип 2

Студијата за дијабетес тип 2, објавена во списанието „Природни комуникации“ (Nature Communications), следела речиси 109.000 учесници кои на почетокот на истражувањето немале дијабетес. Дванаесет од 17 испитувани конзерванси биле поврзани со до 50 проценти поголем ризик од развој на дијабетес тип 2 кај лицата кои консумирале најголеми количини.

Меѓу нив биле калиум-сорбат, калиум-метабисулфит, натриум-нитрит, оцетна киселина и натриум-ацетат.

Авторите предупредуваат дека ова се првите студии кои ја испитуваат врската меѓу конзервансите во храната и ризикот од рак и дијабетес тип 2, како и дека се потребни дополнителни истражувања за да се потврдат резултатите.

„Овие податоци ја поддржуваат потребата од преиспитување на регулативите што ја уредуваат употребата на адитиви во храната, со цел да се подобри заштитата на потрошувачите“, наведе Анаис Хасенболер, водечка авторка на студиите.