Срѓан Тодоровиќ: По смртта на синот, не сум веќе ист
Познатиот српски актер Срѓан Жика Тодоровиќ за првпат отворено прозборе за трагедијата што му го смени животот.
Во 2017 година ненадејно починал тригодишниот Дејан, син на актерот, кој го добил со сопругата Ана по 12 години борба за потомство. По смртта, како што вели Срѓан, тој и сопругата паднале во депресија, а тој многу ослабнал бидејќи не можел да јаде. Иако размислувале за второ дете, сè уште не се решиле на таков чекор.
„Никогаш во животот не сум се чувствувал полошо. Како да ми се направи некаква дупка во душата, која е ненадоместлива. Сите ми велат: „Мораш да продолжиш понатаму, морате да имате второ дете“. А, тогаш ни текнува дека е светска пандемија и се случуваат чудни работи. Не знае човек што да прави, кога нешто такво ќе му се случи“, изјави актерот во интервју за порталот „Нова РС“.
Синдром на ненадејна смрт
Пред четири години, Срѓан со сопругата Ана и синот Дејан отишле на лекар бидејќи малиот бил настинат. Кога се вратиле, детето легнало да спие, а два часа подоцна Ана забележала дека нешто не е во ред со него. Повикале брза помош, но лекарите не можеле ништо да направат. На обдукција било потврдено дека срцето престанало да му чука и дека станува збор за синдром на ненадејна смрт на детето.
„Јас не познавам никој кому му се случило такво нешто. Токму во моментот кога почнуваше со мене да зборува, кога почнувавме да градиме однос татко и син, почнувавме да разговараме, постојано ме потпрашуваше: „А зошто ова, тато, а зошто она“, тогаш се случи. Понекогаш си помислувам дека има и полоши варијанти – да беше повозрасен, сè ќе беше потешко и потешко. Некогаш си велам: – Заспа и не се разбуди, барем не се мачеше“, вели Срѓан.
Со сопругата Ана се заедно повеќе од 20 години, а актерот раскажа како оваа трагедија влијаела врз нивниот однос.
„Не стана збор за развод. Животот треба да се проживее заедно. Се обвинувам само себеси. Нормални и зрели луѓе за такви работи никогаш не го обвинуваат другиот. Прашање е дали воопшто ние сме виновни или таква била судбината. Ова е првпат да зборувам јавно за тоа, но дупката во душата засекогаш ќе остане. Јас инаку пишувам песни, само за своја душа и не ги објавувам бидејќи сум многу срамежлив. Има и многу лични работи во нив. Има една песна што му е посветена на Деки“, вели актерот.
Неговиот син Дејан е кремиран на 23 декември 2017 година во Белград, а по една година неговата урна е положена покрај урната на дедо му Бора Тодоровиќ, во Алејата на великаните на белградските гробишта.