Спасувачки бродови и хеликоптери во екстремно лоши временски услови и немирно море сè уште трагаат по 78 лица кои се водат како исчезнати, откако под налет на циклон потона баржа кај Мумбај.

За 24 часа, три бродови и хеликоптери спасиле 183 лица.

Во друга операција, 35 членови на екипажот од друг брод што се насука северно од Мумбај се извлечени со хеликоптер, соопштија властите.

Двете баржи работеле за најголемата индиска компанија за сурова нафта и природен гас, „Оил енд натурал гас корп”.

Компанијата соопшти дека на бродовите имало работници ангажирани на дупчење во близина на брегот, и оти циклонот им ги однел сидрата.

Циклонот Таукте, најсилното невреме што го зафати регионот во повеќе од две децении, го погоди крајбрежјето доцна во понеделникот со 210 километри на час, при што загинаа најмалку 25 лица во Гуџарат и Махараштра.