Заменик-министерот за надворешни работи на Бугарија, Костадин Којабашев, денеска изјави дека иницијативата за референдум против Договорот со Бугарија во Северна Македонија нема да претставува пречка во исполнувањето на обврските што ги презеде Скопје.

Тој посочува дека иницијативата, предложена од опозициската ВМРО-ДПМНЕ, беше одбиена како неуставна од претседателот на македонското Собрание, Талат Џафери.

-Од оваа гледна точка, во моментов не сметаме дека ова прашање ќе биде актуелно, бидејќи политичките партии Левица и ВМРО-ДПМНЕ засега само ја оспоруваат оваа одлука во јавниот простор, но од правен аспект, тоа е сосема непоколебливо, изјави Којабашев, според БНР.

Министерството за надворешни работи на Бугарија информираше дека на 12 септември членовите од бугарската страна на Мешовитата историска комисија пред министерствата за образование и наука и за надворешни работи ги презентирале резултатите од работата на Комисијата во областа на образованието.

Како што пренесе БНР, Министерството соопштило дека се започнати подготовките за имплементација на договорите.