Силно невреме го погоди Липково, селото побелено од град со големина на орев
![](https://www.slobodenpecat.mk/wp-content/uploads/2024/05/grad.jpg)
Интензивен пороен дожд, грмежи, силен ветер и појава на град попладнево го зафати кумановскиот регион.
Според објавите и фотографиите кои се шират на социјалните мрежи, во селото Липково паѓал град со големина на орев и целиот простор е побелен.
Во Регионалниот центар за управување со кризи – Куманово била пријавена материјална штета на викенд куќа во селото Младо Нагоричане, каде што имало и уништени родни дрвца, а во Липковско биле пријавени штети на земјоделски површини.
Во Куманово, пак, како што пренесува дописничката на МИА, поради големата количина дожд и недостигот на атмосферска канализација, водата се слевала по улиците.
Од Центарот за управување со кризи попладнево информираа дека во подрачјето околу Качаничката Клисура и Скопска Црна Гора има значителна нестабилна облачна маса која се движи во правец кон Куманово.