Кое е вашето омилено животно од Зоолошката градина – Скопје? Дали знаете како се вика, колку години има, од која земја потекнува и кога за првпат бил донесен тој вид, таа единка кај нас? Нашата Зоолошка постои од 1926 година и низ годините се развивала просторно, а растел и бројот на животните. Денес при посетата на Зоолошката градина можете да се запознаете со стотици разновидни единки, а секоја од нив крие посебна судбина.

„Слободен печат“, низ овој серијал, кој го нарековме „Лична карта на жителите на ЗОО Скопје“, ќе се обиде да ви ги доближи нивните приказни, нивните карактери и чувства. Ќе се обидеме да ви овозможиме да дознаете што јадат и која е нивната омилена храна, ќе дознаете нешто ново и забавно, поврзано со омилените сожители во главниот град.

За време на пандемијата, скопската Зоолошка се збогати со убавите розеви фламинга. Тие се многу специфични птици, кои бараат поинаков третман и со тоа претставуваат вистински предизвик за еден ЗОО-негувател. Посетителите можат да уживаат во глетката од 14 возрасни раскошни птици, како си прават спа-третман на нозете во кал, вели за „Слободен печат“ ЗОО негувателот, Војо Иванов.

– Фламингата имаат многу нежни нозе, тие уживаат постојано да си прават спа-третман. Специјално, за нив одиме и во околината и бараме глина за да им ја овозможиме оваа потреба. Нозете на оваа птица не се направени за да седат на суво. И исто како што и ние луѓето имаме иритација на нозете, се случува и кај нив, кај нас се вика плускавец, а кај нив „бамбл фит“ – вели Иванов.

Ова е вид на розево фламинго и многу често посетителите се изненадени кога ќе видат дека кај нив не доминира розевата боја.

– Најчесто поставувано прашање е зошто не се розеви, туку се повеќе бели. Нашите фламинга се еден од шесте видови, ние ги имаме најголемите, „грејтер“. Тоа се оние птици кои можат да мигрираат во Африка и Европа. За разлика од нив, оние на Карибите се розеви. Нашите не се розеви, но се најголеми – објаснува Иванов.

Тие не се птици коишто сакаат да летаат многу често, но на ветер се возбудуваат и прават мали прелети и овде во нивниот дом. Нашата камера долови еден таков симпатичен ефект.

Целото видео погледнете го во продолжение: