Водечките синдикални претставници во „Фолксваген“ изјавија дека нема да дозволат затворање на фабрики во Германија, иако остануваат отворени за предлози што би ја обезбедиле иднината на недоволно искористените производствени капацитети. Во заедничка изјава за Ројтерс, претседателката на работничкиот совет Даниела Кавало, лидерката на синдикатот IG Metall, Кристијане Бенер и регионалниот синдикален лидер Торстен Грегер нагласија дека договорот од 2024 година, кој гарантира зачувување на германските погони, не смее да се доведува во прашање, пишува Ројтерс.

„Со нас како општ работнички совет и IG Metall, нема да има затворање на фабрики“, изјавија тие.

„Фолксваген“ се соочува со намалување на маржите поради слабата побарувачка и скапиот премин кон електрични возила, како и зголемената конкуренција од Кина и зголемените трошоци поради конфликтот на Блискиот Исток. Директорот Оливер Блуме најави дополнителни мерки за заштеда, вклучително и можноста за споделување на објектите со кинески партнери или продажба на фабриката во Оснабрик.

„Фолксваген“ го прекинува производството на „туарег“

На конференција во Лондон, шефот на „Фолксваген“, Томас Шефер, рече дека групацијата се прилагодува на вишокот капацитет, додавајќи дека затворањата се втората најдобра опција.