Што прави денеска: Никола Серафимов, фудбалер
Никола Серафимов е македонски професионален фудбалер, кој игра за Залаегерцег и за репрезентацијата на Северна Македонија. Еден од најдобрите млади македонски фудбалери, 21-годишниот Серафимов својата кариера ја продолжи во унгарскиот Залаегерцег. Ова е втор интернационален клуб за кој игра Серафимов.
Талентираниот фудбалер потпиша тригодишен договор со екипата, а претходно играше за чешка Јихлава, како и за македонски Вардар. Серафимов, кој фудбалски потекнува од школата на Вардар, претходно во својата кариера имаше настапи и за Пелистер и Брегалница.
Серафимов овој пат ни долови како изгледа едно негово секојдневие.
„Можам да кажам дека како и сите останати спортисти, секој мој ден се одвива по некој „шаблон“. Главно, имаме тренинзи наутро, а јас не сум од оние – ранобудници. Станувам околу 8:30 – 9:00 часот наутро, и тоа со големи тешкотии, и по неколку исклучувања на алармот, станувам, појадувам дома и се упатувам во нашата тренинг-база.
Таму, заедно со моите соиграчи, го пијам моето прво утринско кафе и се подготвувам за тренинг. Генерално, тренираме околу 10 часот.
По секој тренинг, поминувам уште неколку часa во тренинг-базата, правејќи најразлични вежби – или за превенција од повреди или вежби за сила, итн. Еднаш неделно практикувам да користам сауна и секако правам терапии со нашиот медицински тим доколку имам потреба од тоа.
Некаде околу 13 часот завршувам со сите активности во базата и заминувам на ручек. Најчесто на ручек одам во некој од моите омилени ресторани во градот со моите пријатели.
По ручекот, се враќам дома и буквално секој ден морам да отспијам барем час и половина, затоа што тогаш ги полнам батериите и попладневниот сон ми е најсладок, но и закрепнувачки за мојот организам.
Навечер, имам време за себе. Слободното време го организирам во зависност од моето расположение. Понекогаш излегувам со пријателите на кафе или на вечера, а многу често знам да останам и дома, да гледам некој добар филм на Нетфликс или да „гејмам“ (играм игрици).
Можам да кажам и дека добро се снаоѓам во кујна и многу често сакам да зготвам нешто за вечера. Главно, тоа се тестенини или моето омилено јадења – пилешко во кари сос. Пред спиење, ги користам социјалните мрежи и слушам музика. Некаде околу полноќ легнувам да спијам, и со тоа завршува мојот ден.“