Инфектолози и епидемиолози во болницата во Гостивар со кои разговараше „Слободен печат“ велат дека испитуваат што се случува и зошто последните три дена нагло е зголемен бројот на пациенти кои бараат помош во болницата поради цревни заболувања, со симптоми на дијареја и повраќање.

Неофицијално, како што со „Слободен печат“ сподели епидемиолог од болницата во Гостивар, само вчера имало 150 прегледи на инфективното одделение – најголемиот дел од пациентите се жалеле на дијареја и повраќање.

Зголемен е бројот и на прегледи на детското одделение, иако најголемиот број пациенти биле на возраст од 18 до 60 години. Епидемиологот ни рече дека таа ги прави епидемиолошките анкети со пациентите, но уште не е пронајден изворот на заразата.

„Уште не можеме да го најдеме изворот на зараза и како настанало ова“, рече таа.

Од Обвинителството за „Слободен печат“ велат дека по наредба на јавен обвинител се преземаат дејствија по поднесена пријава во однос на квалитетот на водата за пиење. На градоначалникот на Гостивар Валбон Лимани му е исклучен телефонот.