Иран соопшти дека утрово извршил прв директен напад врз американски воени објекти во Сирија, по шестата последователна ноќ на американски напади врз ирански воени објекти, објави „Ројтерс“.

Примирјето постигнато минатиот месец се претвори во секојдневни напади и контранапади, што во голема мера го запре бродскиот сообраќај низ Ормускиот Теснец и предизвика нова загриженост кај инвеститорите за последиците од војната што САД и Израел ја започнаа во февруари врз глобалната економија.

Американската војска соопшти дека уште една ноќ извршила напади врз Иран „со цел дополнително да ги ослаби иранските воени способности“, вклучително и врз островот Кешм и во близина на Бандар Абас, каде се наоѓа најголемото пристаниште во Иран, како и врз клучни поморски објекти и објекти на Револуционерната гарда.

„Американските сили, вклучително и борбени авиони, беспилотни летала и воени бродови, употребија прецизно оружје кое погоди десетици ирански воени цели, како што се крајбрежни системи за надзор и противвоздушна одбрана, воена логистичка инфраструктура и поморски капацитети“, соопшти Американската централна команда.

Иран тврди дека го извршил првиот напад во Сирија

Во американски напад врз областа Пасабандар, во близина на пристанишниот град Чабахар, загинал цивил, објави полуофицијалната иранска новинска агенција „Тасним“.

Иран претходно истрела ракети и беспилотни летала кон американски воени бази во соседни земји, вклучително и воздушна база во Јордан.

Рано утринава, иранската војска соопшти дека нападнала американски објекти во Бахреин и во Кувајт.

Неколку експлозии биле слушнати во катарската престолнина Доха, според очевидец, а Министерството за внатрешни работи соопшти дека едно дете било повредено од шрапнел.

Иранските медиуми објавија дека во последниот круг американски напади биле погодени пет мостови, како и железничката станица во крајбрежниот град Бандар Хамир и аеродромот Ираншахр во југоисточен Иран.

Во американските напади врз мостови во Бандар Хамир, пристанишен град во Јужен Иран, загинале седум луѓе.

САД ги проширија нападите врз Иран — Техеран возврати со удари кон Катар, Бахреин и Кувајт

Иранските државни медиуми објавија дека Револуционерната гарда нападнала команден центар на американските специјални сили во Ал Танф, Сирија, како одмазда за убиството на ирански војници во Ираншахр. „Ројтерс“ не можеше веднаш да ги потврди овие извештаи.

Ова е прв директен напад на Иран врз Сирија, која се обидува да избегне вовлекување во конфликтот што ги зафати соседните земји.

Во Либан, борци на Хезболах, поддржани од Иран, се борат против израелските сили, а во Ирак, вооружени групи поддржани од Иран извршија напади со беспилотни летала и со ракети.

Револуционерната гарда на Иран соопшти дека уништила поморски радарски систем на карпите Саламе и американски радар за воздушна контрола во областа Ганем во Оман.

Бродскиот сообраќај повторно запрен во Ормускиот Теснец

Ескалацијата на нападите повторно во голема мера го запре сообраќајот низ Ормускиот Теснец, најважниот светски поморски пат за транспорт на нафта и на гас, што доведе до раст на цените на нафтата и нови стравувања од влијанието врз инфлацијата.

Техеран ја обнови блокадата на теснецот, а Вашингтон повторно воведе блокада врз иранските пристаништа од средата.

Иран сигнализираше дека би можел да ги поттикне своите сојузници Хутите во Јемен да затворат уште еден клучен теснец – Баб ел Мандеб, на влезот во Црвеното Море – доколку Вашингтон ја нападне иранската инфраструктура.

Минатата недела Иран нападна бродови кои се движеле низ коридор во теснецот.

Портпаролката на Белата куќа, Каролин Левит, вчера изјави дека претседателот Доналд Трамп нема да „седи и да дозволи овие активни терористички дејствија да продолжат во теснецот без да се погрижи Иран да сноси последици за тоа“.

Сепак, таа додаде дека претседателот „истовремено секогаш е отворен за дипломатија“.

Ирански извори изјавиле дека целта на Техеран е да воспостави своја контрола над теснецот, но дека не сака ескалација која би го загрозила меморандумот за разбирање од јуни, за кој сè уште смета дека му обезбедува најголем дел од она што го барал.

САД и Иран повторно во ескалација: нови напади, закани и стравувања од „вечна војна“