Владата на денешната седница донесе одлука да го продолжи рокот на кризната состојба поради можни нарушувања во снабдувањето со нафта и нафтени деривати. Новиот рок ќе важи од 21 јули до 20 октомври. Според Владата, продолжувањето на кризната состојба има за цел да обезбеди континуитет во институционалното постапување и навремено реагирање доколку дојде до прекини во снабдувањето или до значителни ценовни шокови на меѓународните пазари.

-Со оваа одлука Владата располага со правен механизам за брза и ефикасна реакција, со цел да се зачува стабилноста во снабдувањето, да се ублажат последиците од евентуални пазарни нарушувања и да се заштитат интересите и животниот стандард на граѓаните и стопанството- соопшти владината прес-служба.

Одлуката, по завршување на владините процедури, ќе биде доставена до Собранието на разгледување и усвојување, согласно законските надлежности. Од Владата најавуваат дека и натаму внимателно ќе ги следат состојбите на домашниот и меѓународниот енергетски пазар и, доколку биде потребно, ќе преземат дополнителни мерки за обезбедување стабилно и непречено снабдување со нафта и нафтени деривати.

Нов скок на цените на нафтата