Новиот тренер на Барселона Кике Сетиен призна дека не очекуваше буквално „преку ноќ“ ќе седне на клупата на каталонскиот гигант. Тој во понеделникот беше именуван како нов стратег на шпанскиот шампион, откако управата му врачи отказ на Ернесто Валверде.

На промоцијата сликовито опиша како го изненади одлуката на челниците на Барселона.

– Ниту во своите најлуди соништа не можев да замислам дека ќе бидам тука. Вчера шетав покрај кравите во моето село, а сега ги тренирам најдобрите фудбалери на светот – рече Сетиен.

Поранешниот тренер на Лас Палмас и Бетис вели дека особено со нетрпение очекува да работи со најдобриот играч на светот, Лионел Меси.

– Изминативе 12 години уживав пред ТВ екраните гледајќи го Меси и сите овие играчи кои го направија уште поубав фудбалот.

Неговиот договор со Барселона важи до јуни 2022 година.

– Возбуден сум од овој предизвик и од проектот. Тоа е најголемото нешто што ќе се обидам да им го пренесам на играчите – додаде новиот тренер на Барселона.