Секој викенд ќе има спринт трки во Мото ГП шампионатот
По примерот на Формула 1, и шампионатот во Мото ГП ќе воведе спринтерски трки од следната сезона и тие ќе се возат за време на секој тркачки викенд, беше потврдено на Големата награда на Австрија.
Веста за воведување на спринтерски трки се појави во претходните денови и ги изненади дури и самите возачи, кои за промената дознаа од новинарите.
Официјалната потврда пристигна на патеката „Ред Бул Ринг“, а првиот човек на Дорна Кармело Еспелета, претседателот на Меѓународната асоцијација на тркачки тимови (ИРТА) Ерве Поншарал и првиот човек на Светската мотоциклистичка федерација Хорхе Виегас истакнаа дека имаа едногласна поддршка од тимовите.
Еспелета исто така вели дека задача на тимовите е да ги информираат своите возачи.
Она што во моментов е познато е дека спринтерските трки ќе се возат во сабота, половина од стандардната трка ќе се вози и половина од стандардните бодови ќе бидат доделени. Резултатите од таа трка нема да го одредат стартниот редослед на главната трка, туку и понатаму ќе се возат главните квалификации. Како точно ќе изгледа комплетниот тркачки викенд ќе биде објавено подоцна.