На почетокот на оваа недела, компанијата „ГРУ Спејс“ (GRU Space) ги покани сите заинтересирани да платат депозит од 250.000 до милион долари, што би им обезбедило право на место во една од првите мисии на површината на Месечината, потенцијално за околу шест години, пишува „Арс техника“.

Звучи како научна фантастика

Сето ова изгледа како научна фантастика, особено затоа што „ГРУ Спејс“, според основачот Скајлер Чан, имал само еден вработен со полно работно време на крајот од минатата година – тој самиот. Во исто време, Чан неодамна дипломирал на Универзитетот во Калифорнија, Беркли.

Сè може да се отфрли како младешки тренд, но Чан ги презентира своите идеи сериозно и внимателно. И додека често се зборува за експлоатација на ресурсите на Месечината, тој верува дека најстабилната долгорочна активност всушност ќе биде вселенскиот туризам. Месечината, како што вели тој, ги има сите предиспозиции да стане исклучителна дестинација.

Кои се идните гости?

Како и многу млади луѓе, Чан пораснал сонувајќи да стане астронаут. Сепак, за време на неговото образование, тој сфатил дека може да има поголемо влијание ако помогне вселената да стане достапна за сите, а не само за неколкумина избрани.

– Сфатив дека живеам во време кога човештвото навистина може да стане меѓупланетарен вид, и тоа е веројатно најважното нешто на што некој може да се посвети – рекол Чан.

За време на студиите, тој работел како практикант во Тесла, развивал софтвер за возила и учествувал во проект за 3Д печатач финансиран од НАСА, кој бил лансиран во вселената. Тогаш дошол до клучен увид: речиси сите проекти поврзани со Месечината се потпираат на државата или милијардерите. Но, кои се вистинските комерцијални корисници?

– Сфатив дека недостасува третиот столб – индустријата за вселенски туризам. Ако можеме да изградиме хотел на Месечината, тогаш можеме да изградиме инфраструктура – магацини, бази, патишта. А подоцна, да го повториме истото и на Марс – рекол тој.

Амбициозен, но не без основа

Името „ГРУ“ е кратенка за користење на галактички ресурси, а долгорочната визија на компанијата е да ги користи ресурсите на Месечината, Марс и астероидите за да го прошири човечкото присуство во вселената.

Иако звучи многу амбициозно, проектот веќе има почетна поддршка – „ГРУ Спејс“ доби „основна“ инвестиција од „Вај комбинатор“ (Y Combinator), еден од најпознатите „стартап“ забрзувачи.

Првата демонстративна мисија е планирана за 2029 година, кога компанијата би испратила мал товар на комерцијален лендер на Месечината. Целта е да се тестираат надувувачки структури и производство на „месечеви тули“ од реголит. Следниот чекор би бил поголем објект поставен во природни месечеви вдлабнатини.

Првиот вистински хотел, исто така од надувувачка конструкција, е планиран за 2032 година и би можел да прими до четири гости. Подоцна, би следела полуксузна верзија, изградена од материјали добиени на самата Месечина, моделирана по познатата Палата на ликовни уметности во Сан Франциско.

Зошто хотел, а не авион?

Едно од логичните прашања е: зошто воопшто да се гради хотел, ако туристите сепак ќе патуваат со вселенски летала како што е вселенскиот брод „СпејсИкс“?

– „СпејсИкс“ прави транспорт, како „Федекс“. Но, мора да постои дестинација каде што сакате да престојувате. Не можеме да живееме засекогаш во бродот што прв нè донесе. Ако сакаме да останеме, мора да изградиме објекти, инфраструктура и места за живеење – заклучил Чан.