Иницијативата на францускиот претседател Емануел Макрон да се формира „европска политичка заедница“ е испраќање сигнали кон државите кандидати почнувајки од Украина која е во војна со Русија, но и останатите што имаат европски соништа, коментира поранешниот дипломат Нано Ружин.

– Европската Унија не може да биде единствената алатка за структурирање на европскиот континент. Претседавачот на Институтот „Жак Делор“, Енрико Лета кој е воедно шеф на Италијанската демократска партија, две недели работел на овој проект со дискретна поддршка на Марио Драги, претседателот на италијанскиот совет. Според нивното мислење, оваа „европска политичка заедница“ би можела да одговори и на аспирациите на Украина, Молдавија и Грузија, но зошто да не и на Казакстан, Узбекистан, Турција, како и на државите од Западен Балкан. Канцеларот на Германија Олаф Шолц идејата ја оквалификува како „многу интересна“, без да ги обесхрабри државите како Северна Македонија (која ја спомена) или и останатите дека полноправното членство е под знак прашање, изјави Ружин за „Слободен печат“.

Според него, геополитичката криза, пораката на Макрон за „европска политичка заедница“ и праксата од досегашното функционирање на „Отворен Балкан“ се показател за придобивките на овој регионален проект.

– Убеден сум дека и Црна Гора и Косово гледаат каков бенефит имаат нивните соседи Србија и Албанија. Пораката на Абазовиќ за „Отворен Балкан“ беше пратена и кон црногорските граѓани, но и кон Албанците на Косово, смета Ружин.