Премиерот Христијан Мицкоски вечерва на крајот од расправата, непосредно пред гласањето на новиот, реконструиран владин кабинет, упати извинување за, како што рече, денешните случувањата во Собранието, изразувајќи надеж дека такви настани нема да се повторат.

Пратеничката група на СДСМ претходно ја напушти седницата и на вонредна прес-конференција рече дека премиерот и старо-новиот министер, Иван Стоилковиќ, за време на расправата ги навредиле пратениците на СДСМ, Фатмир Битиќи и Митко Трајчулески.

ВИДЕО | СДСМ реагира по непријатните и тензични сцени во Собранието, бара извинување од Мицкоски и Стоилковиќ

„Како претседател на Владата, сакам да се извинам на вас, на пратениците и на граѓаните што денеска бевме сведоци на овие настани и се надевам дека тоа никогаш повеќе нема да ни се повтори“, рече од собраниската говорница премиерот, за кого од СДСМ рекоа дека претходно го нарекол Битиќи „исфруструран, мизогин лик“.

Сепак, револтирани поради тоа што не го добија бараното извинување и од кандидатот за министер Иван Стоилковиќ, пратениците на Социјалдемократскиот сојуз (СДСМ), Демократската унија за интеграција (ДУИ) и Алијансата за Албанците ја напуштија седницата.

Веднаш по ова, пратениците гласаа за реконструираниот владин кабинет, а осумтемина нови министри добија поддршка од 69-те присутни пратеници, без гласови против и без воздржани.

Нов министер за правда е Јетон Шасивари од Вреди, министер за здравство е Сашо Клековски од ВМРО-ДПМНЕ, министер за култура и туризам Седат Сулејмани од Вреди, министер за земјоделство, шумарство и водостопанство Борче Серафимовски од ЗНАМ, министер за односи меѓу заедниците Агон Ферати од Вредим, министер за социјална политика, демографија и млади Ѓоко Велковски од ВМРО-ДПМНЕ, министер за локална самоуправа Иван Стоиљковиќ од Демократската партија на Србите во Македонија, а за министер без ресор е избран Ерџан Демир од ВМРО-ДПМНЕ.

Мицкоски испофали осуммина министри, па ги смени