Португалија како европски шампион во натпреварувањето доминира и во новото издание од Лигата на нации, вечерва на „Френдс Арена“ во Стокхолм ја совлада репрезентацијата на Шведска (0:2).

Фантастична партија имаше ѕвездата на Јувентус, Кристијано Роналдо кој ги обезбеди трите бода за својата селекција. Најпрвин стрелаше непосредно пред паузата (45+1`) со прекрасен гол од слободен удар, што беше негов 100 јубилеен за португалската репрезентација.

Во 72 минута постигна уште еден одличен гол после асистенцијата на Жоао Феликс за поставување на конечниот епилог и втор триумф.

Во истата група „3“ од Лигата „А“ како реприза од финалето на последното Светско првенство, Франција со 4:2 беше подобра од Хрватска.

Во Париз „коцкестите“ први беа во предност благодарение на Ловрен во 17 минута, но „триколорите“ направија пресврт пред крајот на првото полувреме преку Гризман и автоголот на Ливаковиќ.

Израмнија Хрватите во 55 минута со погодокот на Брекало, а трите бода за француската репрезентација ги донесоа Упамекано (65`) и Жиру од пенал (77`).

Лига на нации

2. коло, резултати –

Лига „А“
Белгија-Исланд 5:1
Данска-Англија 0:0
Франција-Хрватска 4:2
Шведска-Португалија 0:2

Лига „Ц“
Ерменија-Естонија 2:0
Грузија-Македонија 1:1
Кипар-Азербејџан 0:1
Луксембург-Црна Гора 0:1

Лига „Д“
Сан Марино-Лихтенштајн 0:1