Ловци на метеорити се упатија кон североисточниот дел на американската држава Охајо во потрага по фрагменти од метеорот што го погоди округот Медина на 17 март.

Метеорот произведе моќен звук што ги потресе зградите и предизвика паника, а неговата огнена трага низ небото беше видлива од Висконсин до Мериленд. НАСА подоцна потврди дека станува збор за небесно тело со тежина од околу седум тони.

Сепак, во следните денови, голем број луѓе се придружија на потрагата по неговите фрагменти поради нивниот необичен состав.

Меѓу нив бил и Роберто Варгас, кој објасни за „Њуз 5 Кливленд“ дека специфичноста на метеорот е што во него нема метал. Неговата кора изгледа како стакло и се верува дека припаѓа на тип наречен еукрит.

– Соединетите Американски Држави не забележале пад на еукритите од 2004 година, па ова е прв таков случај по повеќе од 20 години, што е прилично голема работа и историски момент за областа – рекол Варгас.

– Првиот ден барав од зори до самрак и речиси се откажав, но решив да погледнам во уште еден ќорсокак. Додека одев, погледнав надолу кон земјата и видов мал фрагмент. Најдов парче со тежина од 12,2 грама, а неговата кора сјаеше на сонцето – додал тој.

Во текот на изминатите неколку дена, тој продолжи со потрагата и пронајде уште неколку парчиња што планира да ги донира.

– Овие карпи се стари околу 4,5 милијарди години и доаѓаат од вселената. Тие ни кажуваат за потеклото на видовите и формирањето на планетите. Не сум особено паметен човек, но можам да придонесам во науката -рекол ловецот на метеорити.

Според „Њујорк тајмс“, се проценува дека до 150 килограми метеорити завршиле помеѓу Висконсин и Мериленд, кои ги бараат десетици „ловци на богатство“.

Некои од нив бараат материјална добивка, други сакаат да придонесат во науката, додека трети сонуваат да држат парче од космосот во свои раце.

– Пред три дена ова мало нешто беше од другата страна на Мика. Сега е во моја рака – заклучил Варгас.