Ирската нискобуџетна авиокомпанија Рајанер објави дека ќе прифаќа само дигитални карти за влез во авион од 12 ноември, со што ќе се елиминира употребата на печатени карти за влез во авион. Патниците сега ќе мора да се пријават онлајн и да ги генерираат своите билети во апликацијата myRyanair, објави денес Euronews, додавајќи дека хартиените карти за влез во авион повеќе нема да се прифаќаат на портата. Одлуката предизвика загриженост кај постарите патници кои можеби немаат паметни телефони или не се вешти во нивното користење.

Многумина се прашуваат и што ќе се случи ако нивниот телефон се испразни, биде украден или ја изгуби интернет-врската. Новата политика стапува на сила во среда, 12 ноември, откако промената првично беше планирана за 3 ноември, но беше одложена поради зголеменото патување за време на училишните распусти во Велика Британија.

Компанијата вели дека промената се прави бидејќи речиси 80% од патниците веќе користат дигитални карти за влез во авионот. Рајанер вели дека се приклучува на други индустрии, како што се фестивали, концерти и спортски настани, кои успешно се префрлија на дигитални билети. Преку апликацијата, патниците можат да нарачуваат храна и пијалоци со приоритетна услуга, да го следат статусот на летот во реално време, да добиваат известувања за излези и доцнења и да складираат патни документи на едно место.

Компанијата прецизираше дека во одредени ситуации, кога патникот нема паметен телефон или му се празни батеријата, ќе може да побара хартиен билет на шалтерот за пријавување на аеродромот. Во тој случај, хартиена карта за влез во авионот ќе се издава бесплатно, под услов патникот претходно да завршил онлајн пријавување- пренесе Политика.