Студентските организации повикаа на бојкот и демонстрации низ Соединети Американски Држави денес барајќи отстранување на федералните агенти од Минесота, по смртоносното пукање врз двајца американски државјани во Минеаполис, инциденти што предизвикаа јавно негодување, пренесува Ројтерс.

Повикот за генерален штрајк доаѓа по протестите од минатиот петок, кога илјадници луѓе излегоа на улиците на Минеаполис, и покрај големиот студ, барајќи од американскиот претседател Доналд Трамп да ги запре операциите за апсење на нелегални имигранти во градот.

Денес, студентските организации велат дека се стремат да го зголемат притисокот врз Трамп, и покрај неговите изјави дека ќе има „мала деескалација“ во Минесота.

„Сакаме ова да се претвори во долгорочно движење, за во иднина да има повеќе штрајкови, повеќе протести“, рече Бријана Џексон, членка на Унијата на црни студенти на Универзитетот во Минесота, во видео објавено за промоција на протестното движење.

„Нема работа, нема училиште, нема шопинг. Престанете да го финансирате ИЦЕ“, е слоганот на веб-страницата nationalshutdown.org, на кој се наведува дека ќе се одржат 250 протести во 46 држави и поголеми градови во САД, како што се Њујорк , Лос Анџелес , Чикаго и Вашингтон.

Во државата Џорџија, ученици од 90 средни училишта, од Атланта до Савана, планираат да изостанат часови денес.

Во меѓувреме, во четвртокот, полицијата во федералниот главен град Вашингтон уапси 54 демонстранти кои одржаа протест со седење пред зградата на Сенатот барајќи да не се одобрува финансирањето за Министерството за внатрешна безбедност, кое го вклучува и ICE.

Исто така вчера, „царот на границите“ Том Хоман, кој ја презеде функцијата шеф на имиграциските операции во Минесота, рече дека федералните агенти сега ќе бидат ограничени на целни операции.

Покрај тоа, во новите издадени упатства се бара од федералните агенти да избегнуваат непотребен контакт со „проблематичните“ за да не се „дестабилизира ситуацијата“.

По неколку недели објавување на десетици видеа на кои се гледаат насилните тактики на тешко вооружени и маскирани полицајци во Минеаполис , процентот на Американци кои ја одобруваат имиграциската политика на Трамп падна на најниско ниво забележано за време на неговиот втор мандат, според анкета на Ројтерс/Ипсос.

Поголемиот дел од испитаниците оценија дека операциите за идентификување на нерегуларни мигранти отишле предалеку.

Агентите на ИЦЕ во Минесота добиле насоки да се држат настрана од „агитатори“