Пред нас e најмагичниот период од годината, кога сечиј дом зрачи со топлина, многу бои и светилки. Главниот празничен декор несомнено е новогодишната елка, која може да се украси на безброј начини. Но, можеби најуникатниот и најекономичен начин е кога се украсува со рачно изработени новогодишни орнаменти.

Рачно изработените орнаменти за новогодишна елка носат посебна топлина и магија во домот. Секој украс е уникатен, создаден со љубов и внимание кон деталите.

Моника Младеновска Бунтеска, креаторот кој стои зад инстаграм-профилот и јутјуб-каналот „Хоум бај Мон“, е позната по своите „направи сам“ изработки за уредување домови. Меѓу сите нејзини интересни и креативни декорации за ентериер може да ги најдете и оние инспирирани од новогодишните празници.

Таа слободното време го поминува во креирање, реставрирање и уредување, а новогодишните и божиќните празници за неа се совршен период за творење.

– Новогодишните и божиќните празници за мене се време на бавност, посветување време на домот и семејството, но и совршено време да бидеме креативни и да направиме нешто сами – вели Моника.

За празниците секогаш се труди да создаде чувство на топлина во домот, па затоа најчесто користи природни материјали за изработка на орнаменти и декорации.

– Во просторот сакам природни елементи, гранчиња од зимзелени дрвја, шишарки, стаклени шишиња претворени во свеќници и минималистички детали наместо пренатрупан декор. Истото важи и за елката, која секогаш ја декорирам во декември. Традиција која ја оддржувам со години е секогаш да ги правам сама орнаментите, и секоја година да додавам барем по еден нов, рачно изработен украс. Таа е најчесто декорирана минималистички во неутрални бои, како и мојот дом генерално – открива Моника.

Нејзината главна инспирација за новогодишните орнаметни е природата и секогаш користи материјали кои се во нејзината околина.

– Инспирацијата за новогодишните орнаменти ја црпам од природата и од тоа што веќе го имам дома – суви портокали, парчиња ткаенина, глина и листови хартија. Во време на масовно производство и евтин шопинг, јас верувам дека најубавите украси се оние што ќе ги направиме сами. Не трошиме материјални средства, ја намалуваме консумацијата, и создаваме нешто уникатно за нашиот дом – вели таа.

Во продолжение погледнете ги четирите предлози за „направи сам“ новогодишни орнаменти, кои ќе ја разубават новогодишната елка во вашиот дом.

Оригами ѕвезда:

1. Исечи 2 подебели ливчиња хартија во боја и големина по избор
(јас користев хамер во боја)
2. Преклопи ги на пола од двете страни, а потоа и дијагонално
3. Засечи ги до пола сите четири страни
4. Преклопи ги и залепи ги со лепак
5. Спој ги двете половинки и залепи коноп за закачување

Дрвен венец:

1. Исечи мало парче жица и свиткај го во круг
2. На него нанижи ги дрвените монистра
3. Затвори ја жицата на двата краја и спој ги со коноп
4. Залепи машничка или гранчиња од елка

Топче од хартија:

1. Од лист во боја по избор исечи 30-40 крукчиња, сите со еднаква големина
2. Преклопи го секое крукче на пола и залепи го ставајќи една линија лепак во средината
3. Залепените полукрукчиња залепи ги едно со друго со две линии лепак
4. Стави коноп за закачување и залепи ги почетокот и крајот

Мразулец од глина:

1. Исукај едно мало парче глина
2. Исечи тенка лента, околу 1 см
3. Почни да ги вртиш едниот крај и другиот крај на различни страни
4. Направи дупче за коноп на едниот крај, а шпиц на другиот крај
5. Остави го да се исуши и протни коноп за закачување