Сите возачи во Македонија од недела мора да имаат соодветна зимска опрема во своите возила, согласно Законот за безбедност на сообраќајот, потсетува МВР. Оваа обврска важи за сите моторни возила во јавен сообраќај, без разлика на временските услови, и трае до 15 март.

Возењето без пропишана зимска опрема во овој период се казнува со 45 евра во денарска противвредност, а полицијата може и да го исклучи возилото од сообраќај.

Што се смета за зимска опрема?

За патнички автомобили до 3.500 килограми потребни се: зимски гуми на сите четири тркала со најмалку 4 милиметри длабочина на шарата или летни гуми со иста минимална длабочина, но со задолжителни синџири за снег во возилото.

Возилата со погон на сите четири тркала треба да имаат зимски гуми со најмалку 6 милиметри длабочина. Кај камионите и автобусите задолжителни се зимски пневматици на погонските тркала, како и лопата или синџири за снег.

Како зимски пневматици се признаваат гумите со ознаките „M+S“, „M&S“, „MS“ или со симбол снегулка на стилизирана планина.