Актерот Томи Ли Џонс се огласи по ненадејната смрт на неговата ќерка Викторија, која почина на Нова година на 34-годишна возраст. Нејзиното безживотно тело било пронајдено во хотелска соба во Сан Франциско.

Во кратка изјава за списанието „Пипл“, семејството порача:

„Ги цениме сите убави зборови, мисли и молитви“.

Тие замолија за разбирање и приватност додека минуваат низ тежок период:

„Ве молиме да ја почитувате нашата приватност во овој тежок момент. Ви благодариме“.

Истрагата е во тек

Викторија, која и самата била актерка, била пронајдена мртва во хотелот „Фермонт“ во Сан Франциско, околу 3 часот наутро на 1 јануари, откако бил примен итен повик за медицинска помош.

Околностите на нејзината смрт сè уште се предмет на истрага, а закажана е обдукција за да се утврди точната причина за смртта.

Според противпожарната служба на Сан Франциско, екипите на итната помош реагирале на повикот во 2:52 часот, а на местото на настанот била повикана и полицијата.

Во соопштението се наведува:

„На 1 јануари 2026 година, околу 3:14 часот, полицијата на Сан Франциско реагираше на пријава за починато лице во хотел во блокот 900 на улицата Мејсон. Медицинските лица на лице место констатираа смрт на возрасна жена“.

Кратка актерска кариера

Викторија е родена во 1991 година и е ќерка на актерот од филмот „Луѓе во црно“ и неговата поранешна сопруга Кимберли Клафли. Поранешната двојка го има и син, Остин (43).

Таа накратко тргна по стапките на својот татко, глумејќи со него во филмот „Луѓе во црно 2“, како и во филмот „Трите погреби на Мелкијадес Естрада“.

Иако покажа потенцијал, во последните години се повлече од јавноста, но повремено се појавуваше на црвениот тепих за да го поддржи татка си, особено на филмски фестивали.

Џонс со години јавно зборуваше со гордост за својата ќерка, но еднаш откри дека морал строго да ја научи на професионализам. Во интервју во 2006 година, тој раскажа:

„Ја отпуштив ќерка ми. Требаше да стане во 5 наутро поради улогата, но едно утро одби да стане од кревет“.

Тој додаде:

„Ѝ реков: Душо, ова е работа. Но таа не сакаше да се помрдне. Затоа морав да ја отпуштам“.

Подоцна, улогата сепак ѝ била спасена благодарение на продукцискиот тим, кој успеал да ја разбуди и да ја донесе на сетот токму навреме.

Ќерката на Томи Ли Џонс пронајдена мртва во хотел во Сан Франциско