Парични казни и суспензии добија Гостивар и Пелистер за инцидентите во „Младост“
Македонската кошаркарска федерација денеска донесе одлуки за синоќешните инциденти на натпреварот од Суперлигата помеѓу екипите на Гостивар и Пелистер во салата „Младост“
Во сиот хаос кој траеше скоро три и пол часа, салата во Гостивар мораше да биде испразнета откако со тврд предмет беше погоден тренерот на Пелистер, Марјан Илиевски.
И двата тима се огласија преку социјалните мрежи по повод немилите настани, за КК Гостивар дојде до прекин на мечот бидејќи гостиските играчи се пресметувале физички и вербално со публика и членови на домашниот тим.
Согласно членот 42.8.2, 42.8.3, 42.8.5, 42.9 и 61.2 од Пропозициите за натпреварување во Сениорските лиги, погледнете ги одлуките на Комесарот за натпреварување за натпреварот КК Гостивар – КК Пелистер одигран на 15.05.2022 година во Гостивар.
– Поради слаба организација согласно членот 54.26, екипата на КК „ГОСТИВАР“ се казнува со парична казна од 8.000 денари.
– Поради фрлање на тврди предмети кои може да причинат повреда (запалки, метални пари, пенкала, пластични шишиња и сл.) согласно членот 55.3, екипата на КК „ГОСТИВАР“ се казнува со парична казна од 24.000 денари
– Поради фрлање на тврд предмет (пластично шише) со кој е погоден тренерот на КК „ПЕЛИСТЕР“, Марјан Илиевски, согласно членот 55.10, екипата на КК „ГОСТИВАР“ се казнува со парична казна од 64.000 денари и два (2) натпревари настап без публика на домашен терен.