Дали некој се грижи и го одржува плоштадот „Македонија“?

Утринава граѓаните и туристите пред сувенирницата на плоштад ги пречека падната канделабра, една од барокните. Дали некој ја турнал во текот на ноќта или сама паднала не е познато, но повеќе од сигурно е дека таа во иднина повеќе не е употреблива, судејќи по тоа дека светилките се целосно искршени, а држачите на светилките искривени.
Доколку канделабрата сама паднала, што не е чудно, со оглед на тоа што шрафовите што ја држеле и понатаму си стојат во плочникот, тогаш голема среќа е што не е повреден некој случаен минувач.

Градскиот плоштад, кој е едно од незаобиколните места за посета на туристите, е навистина во лоша состојба. Белите плочки околу фонтаната се нечисти, некаде и искршени. Плоштадот го „красат“ дрвените куќички оставени уште од пред Нова година без никаква намена и функција. Грдата слика ја надополнуваат недоизградените објекти од едната страна, заградени со лимени огради, за кои исто така нема информација дали некогаш ќе се завршат.

Тука е и руинираната зграда на ЕСМ, која со години е оставена без фасада, како и зградата на Пелагонија и портата „Македонија“ со искршениот плочник и дивата такси-станица пред неа.

Крајно време е да се разбудат надлежните и да поведат повеќе грижа за плоштадот.