Во првиот натпревар од 1/16 финалето во ЦЕВ купот македонскиот одбојкарски клуб Струмица во салата „Парк“ загуби од германскиот Дирен со резултат 3:0 во сетови 25:15, 25:19 и 25:17.

Уште на стартот од првиот сет Германците стекнаа висока предност од 12:3, истата подоцна стана и „двоцифрена“ (15:5), а непосредно пред водството од 1:0 во сетови, Дурен имаше и највисоки 24:11.

Слично како во првиот сет, и вториот гостите го стартуваа со висока позитива од 12:4. Подоцна одбојкарите на Струмица доаѓаа неколку пати до „минус три“ негатива (13:10, 15:12, 16:13), но и не и за целосен пресврт. Дирен ја задржа стекнатата предност и дојде до 2:0 во сетови.

Најголеми возбудувања донесе третиот сет во кој Струмица беше рамноправно, константно израмнуваше на (4:4, 6:6, 8:8, 10:10), но никако и да го контролира резултатот во своја корист. Германскиот претставник потоа одржуваше разлика од два-три поени, а до крајот на мечот само ја зголемуваше својата предност до највисоки „плус осум“ (25:17).

Најефикасен во редовите на ОК Струмица беше Тунижанецот Хамди Бен Талеб со девет поени. На спротивната страна со 15 поени доминираше грчкиот интернационалец Димитриос Мухлиас.

Реваншот меѓу екипите на Дирен и Струмица ќе се одигра на 30 ноември.