Американско-израелската војна со Иран би можела да биде еден од мотивите што го натерале мажот обвинет за обид за атентат врз Доналд Трамп и високи функционери од неговата администрација да го изведе нападот, се наведува во разузнавачки извештај на Министерството за домашна безбедност, пишува Ројтерс.

Проценка на Министерството за домашна безбедност

Во извештајот, кој Канцеларијата за разузнавање и анализа при Министерството за домашна безбедност го составила на 27 април како прелиминарна проценка, се наведува дека осомничениот Кол Ален имал „низа забелешки од општествена и политичка природа“.

Судирот со Иран, се заклучува во документот, „можел да придонесе за неговата одлука да го изведе нападот“, при што извештајот се повикува на објави на Ален на социјалните мрежи во кои тој го критикувал американското дејствување во војната.

Оваа проценка фрла нова светлина врз истрагата за мотивите на спречениот напад од 25 април. Иако заклучоците се прелиминарни, тие претставуваат досега најубедлив доказ дека судирот со Иран, кој однесе илјадници животи на Блискиот Исток и ја потресе светската економија, можел да биде повод за нападот.

Извештајот, означен како „Белешка за критичен инцидент“, го добила непрофитната организација „Сопственост на народот“ преку барање за пристап до информации и го споделила со Ројтерс.

Портпарол на Министерството за домашна безбедност одби да ја коментира содржината на проценката.

„Овие извештаи служат за нашите партнери да ги информираме за најновите достапни информации по важни настани што се однесуваат на националната безбедност“, изјави тој.

Истрага и нови обвиненија

Федералното биро за истраги одби да даде коментар, а американското Министерство за правда не одговори на прашањата. Министерството, меѓутоа, овој вторник го прошири обвинението против Ален, додавајќи обвинение за напад врз федерален службеник. Тој се товари дека на безбедносен контролен пункт пукал кон агент на Тајната служба.

Претходно беше обвинет за обид за атентат, употреба на огнено оружје при извршување насилно кривично дело, како и за нелегален превоз на оружје и муниција преку државни граници. Ален сè уште не се изјаснил за виновен.

Американските функционери досега беа воздржани во изјавите за можниот мотив на Ален. Тие упатуваа само на електронска порака што Ален ја испратил до роднини во ноќта на нападот. Во пораката, која ја опишале како манифест, тој изразил гнев кон администрацијата и желба негова мета да биде „предавник“ кој држи говор, без да го спомене Трамп по име.

Во судските документи обвинителите навеле дека Ален „политички не се согласувал“ со Трамп и дека сакал „да се бори“ против владините политики и одлуки што ги сметал за морално неприфатливи.

Што објавувал на интернет

Висок полициски функционер, кој зборувал под услов да остане анонимен, потврди за Ројтерс дека Федералното биро за истраги детално ги испитува активностите на Ален на социјалните мрежи и неговата дигитална трага во потрага по мотивот.

„Тоа внимателно се истражува“, рече функционерот.

Истрагата опфаќа преглед на објави на социјалната мрежа Блускај од профил поврзан со Ален. Во неделите пред нападот, на профилот биле објавени и споделени низа пораки против Трамп. Објавите вклучуваат критики за американските акции во Иран, но и остри напади врз администрацијата на Трамп поради имиграциската политика, Илон Маск и војната на Русија во Украина.

Од тој профил била споделена објава во која се повикува на отповикување на Трамп поради неговата закана од 7 април дека ќе ја уништи иранската цивилизација, изречена само неколку часа пред Трамп да се согласи на прекин на огнот. Исто така, биле споделени и критики на сметка на новинарите кои планирале да присуствуваат на вечерата на дописниците.

Федералното биро за истраги ја прегледало и објавата од 2024 година во која профил поврзан со Ален, цитирајќи библиски стих, навидум го нарекол Трамп „ѓавол“ во одговор на порака на ќерката на Трамп, Тифани.

Целта е да се спречат теории на заговор

Функционерот појасни дека фокусот врз интернет-активностите на Ален делумно е насочен кон спречување на ширење теории на заговор за мотивот на нападот.

Тој додаде дека токму шпекулациите за интернет-активностите на мажот кој во 2024 година пукаше кон Трамп за време на предизборен митинг во Батлер, Пенсилванија, поттикнале бројни и широко распространети теории на заговор.

Атентаторите на Трамп се „осамени волци“ во старо руво, но со интернет

ВИДЕО: Нова снимка од обидот за атентат врз Трамп – Обезбедувањето пробиено за четири секунди