Иако за многумина утрото започнува со омилениот пијалак – најчесто кафе – нутриционистите предупредуваат дека некои напитоци, вклучувајќи го и кафето, не се добар избор кога се консумираат на празен стомак.

Причината е едноставна: тие можат да ја иритираат слузницата на желудникот, да предизвикаат нагли скокови на шеќерот во крвта или да доведат до непријатности како киселини, мачнина, вртоглавица и чувство на слабост.

Според експертите за исхрана, на празен стомак треба да ги избегнувате следниве пијалаци:

Кафе

Иако е најчестиот утрински избор, кафето е и еден од најпроблематичните пијалаци кога се пие на празен стомак. Го зголемува лачењето на желудочна киселина, што може да предизвика киселини, болка во стомакот и долгорочна иритација на желудникот. Дополнително, може да ја зголеми нервозата и да го забрза срцевиот ритам. Стручњаците советуваат пред првата голтка да изедете барем мал залак храна.

Алкохол

Алкохолот на празен стомак многу побрзо се апсорбира во крвта, што значи има посилно и побрзо дејство. Ова може да доведе до вртоглавица, мачнина, нагло паѓање на шеќерот во крвта и дополнително оптоварување на црниот дроб.

Газирани пијалаци

Газирани напитоци, вклучувајќи и минерална вода, можат да предизвикаат надуеност и непријатност кога се пијат на празен стомак. Киселините и шеќерите дополнително го иритираат желудникот.

Овошни сокови (особено цитрусни)

Иако важат за здрави, овошните сокови се богати со киселини и природни шеќери. Кога се пијат на празен стомак, можат да предизвикаат иритација и нагло зголемување на глукозата во крвта, по што следи пад на енергијата.

Енергетски пијалаци

Комбинацијата од кофеин, шеќер и други стимуланси ги прави енергетските пијалаци особено неповолни кога се консумираат на празен стомак. Тие можат да предизвикаат забрзано чукање на срцето, нервоза и ненадеен пад на енергијата.

Празниот стомак е особено чувствителен, а она што го пиеме наутро може значително да влијае врз нашето здравје и општото чувство во текот на денот. Најбезбеден избор наутро е чаша вода или благ чај, додека останатите пијалаци е подобро да се консумираат за време или по оброк.

Малите промени во навиките можат да направат голема разлика за варењето и целокупната состојба на организмот.