Николовски најдобар на меѓународниот шаховски турнир „Скопје Опен“

Интернационалниот мајстор Никола Николовски е победник на возобновениот турнир „Скопје Опен”, кој заврши доцна синоќа, со учество на околу 80 шахисти. Според стартниот рејтинг тој беше трет носител на турнирот, а на крајот е прв на табелата со 7,5 бода од 9 партии, шест победи, три реми, без ниту еден пораз.

Со победа во последното коло, на четвртото место се најде ФМ Тони Лазов со 7 бода, бидејќи имаше едно реми повеќе од конкурентите. На делба на петтото место се најдоа велемајсторите Звонко Станојоски и Владимир Димитров (Бугарија) со 6,5 бода. Горан Главинац со 6 поени ја предводи групата играчи од 7 до 13 место, етаблирајќи се како најдобар од аматерите на турнирот, притоа единствен играч што на целиот турнир играше со сите тројца велемајстори и остана непоразен, освен во дуелите со Николовски и Лазов.

Со идентичен скор како и 21-годишниот шахист од Македонија беа и ИМ Борољуб Златановиќ (Србија) и ИМ Вјачеслав Тиличеев (Русија), кои на крајот според „тај-брејк” критериумите (популарно познат како „Бухолц”) беа рангирани како второпласиран и третопласиран.

– „Скопје Опен” е предвесник за поубава шаховска иднина која македонските љубители на древната игра ја заслужуваат. Зад нас се години во кои нефункционалната федерација не направи ништо за македонските играчи и се соочуваме со голем јаз меѓу постоечката генерација и онаа што доаѓа. Ние сфативме дека мора да се стави акцент на настаните за македонските играчи, па „Скопје Опен” е само почеток, а во соработка со градската управа и заинтересираните помагатели, ќе продолжиме натаму со замисленото темпо да секој месец имаме некаков настан, било да е младински или сениорски, во забрзан или класичен ритам на играње. Воедно, апелираме до пошироката бизнис заедница, својата општествена одговорност да ја искажат преку поддршка на шахот, затоа што на овие големи умови, почнувајќи од оние што играат за сениорската репрезентација, па се до најмалите ученици, тоа им е мошне потребно – рече Ѓорѓи Миновски, претседател на Шаховскиот сојуз на Град Скопје, кој беше организатор на турнирот.

Македонските шахисти и во минатото имале забележителни успеси на меѓународен план, но поради игноранцијата на државата за проблемите во кои е оваа спортска дисциплина кај нас, ситуацијата е влошена по сите параметри.

– Доколку говорам само за турнирот, бројката од 80 играчи, меѓу кои имаше и 20 странци, според мене не ја отсликува добро желбата на играчите кои сакаат да се натпреваруваат. Има објективни и субјективни причини, турнирот трае цела седмица, потребно е да се одвои време, па и средства за котизација. Кога шахот во Македонија би имал свои вистински помагатели, па да може да се организираат турнири без котизација за играчите, сигурен сум дека бројката би била два пати поголема. Играчи имаме, но за жал сите бараат изговор да не излезат на турнир, или пак се префрлаат меѓу судиите поради финансиски причини. Тоа е многу поголем проблем и потребно е поголемо разбирање од сите општествени чинители, а пред се од федерацијата која на овој турнир кој беше најмасовен и најквалитетен во Македонија за 2019 година, не му помогна со ништо – дополнува Миновски.

Минатиот месец, Шаховскиот сојуз на Скопје ги возобнови и младинските првенства во сите категории со турнир на кој учествуваат преку 80 млади надежи.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот