Некоја нова Македонија, совладан светскиот шампион на селекторското деби на Лазаров
Ракометната репрезентација на Македонија новата страница во историјата ја започна со голема победа над актуелниот светски шампион Данска со 33:29 во рамки на квалификациите за пласман на ЕП 2022.
Капитенот Кирил Лазаров не можеше да посака подобро деби на селекторската функција против светскиот шампион кој буквално беше надигран во секој сегмент од играта, а притоа се виде новото лице на репрезентацијата.
Повратникот Филип Миркуловски кој по три години повторно го облече репрезентативниот дрес, ја врати борбеноста и пожртвуваноста во репрезентацијата, одбраната успеа целосно да ги запре Данците предводени од Микел Хансен, додека во нападот видлива е „раката“ на Лазаров и новиот стручен штаб . Течна игра, разновидност во акциите, но и одличен настап на ракометарите кои треба да бидат идни носители на репрезентацијата, Филип Талески и Филип Кузмановски.
Со оваа победа, Македонија направи голем исчекор во пласманот на Европското првенство, ракометарите моментно се први на табелата со максимален учинок од три победи во три натпревари.
Ракометарите одлично го започнаа натпреварот, првиот гол во ерата на Кирил Лазаров како селектор го постигна Филип Талески . Македонија во четвртата минута веќе имаше предност од 4:2 со двата гола на Талески и Манасков.
Актуелниот светски шампион постојано ја бркаше предноста на Македонија, успеа да израмни на 7:7, но тоа беше се што успеаја да направат Данците.
Во 17. минута со два брзи гола, од кои вториот беше на Лазаров, Македонија повторно имаше предност од два гола (9:7). Три минути подоцна Филип Талески го совлада Ландин по што Македонија за прв пат има водство и од четири гола (12:8) и предноста ја задржа до крајот на полувремето (17:13). Во првиот дел блескаше и Никола Митревски кој имаше девет одбрани, а во нападот блескаше Филип Талески со пет постигнати гола.
Одличната игра на ракометарите продолжи и во второто полувреме, во одбраната фантастичен беше Никола Митревски, додека играта во нападот доби нова ширина и димензија под палката на селекторот Лазаров. Одличната игра на двата дела од теренот донесе предност од осум гола во 44. минута откако Гоце Георгиевски постигна гол за 25:17.
Данците успеаја да се соземат од шокот кој им го приредија избраниците на Лазаров и постигнаа три гола со кои намалија на 25:20.
Македонија возврати со два брзи гола на Лазаров и Кузмановски со кој повторно дојде до предност од седум гола и водството го задржи до крајот за голема победа од 33:29.
Никола Митревски блескаше на голот со 13 одбрани, а во нападот Манасков, Талески и Кузмановски постигнаа по пет гола, а повратникот Миркуловски даде три, додека селекторот и капитен даде четири гола. Кај Данска, Микел Хансен постигна 11 гола.