Претседателот на САД, Доналд Трамп денеска навести дека крајот на американско-израелската војна против Иран можеби е на повидок, пренесува Анадолу.

„Ги запревме. Никогаш нема да имаат нуклеарно оружје. Никогаш нема да имаат нуклеарно оружје. И наскоро ќе завршиме со тоа. Наскоро ќе биде готово“, рече тој.

Американскиот претседател денес беше меѓу своите поддржувачи во државата Њујорк.

„Ќе видите бројки какви што никогаш не сте виделе, и во позитивна смисла, а и во однос на трошоците, ќе видите како цените на автомобилите паѓаат“, додаде тој пред присутните.

Претходно, иранската новинска агенција објави дека катарска делегација води преговори со иранскиот министер за надворешни работи Абас Арагчи во Техеран, во обид да се стави крај на војната, со посредство на Пакистан.

Извештајот дојде откако началникот на пакистанската армија, Асим Мунир, пристигна во Техеран како дел од тековните посреднички напори на Исламабад за завршување на војната. Ова е негова втора таква посета на Техеран. Пакистанскиот министер за внатрешни работи веќе два дена е во Техеран како дел од индиректните разговори меѓу САД и Иран.

Интензивната дипломатска активност доаѓа во време кога преговарачите ги намалуваат разликите околу договорот за ставање крај на војната.

Посредувањето за прекин на непријателствата започна кога Пакистан обезбеди прекин на огнот на 8 април, со што беше запрена војната, а подоцна беа организирани и разговори на највисоко ниво меѓу САД и Иран од 1979 година наваму, на 11 и 12 април.

Исламабад го засили посредничкиот процес за да обезбеди втора рунда директни разговори меѓу двете страни.

Иран се обидува со помош на Пакистан да изнајде начин да заврши војната со САД