Направете пилешко на турски начин: Лесен ручек кој не се заборава!
Черкеското пилешко е класичен рецепт, кој го смислиле Черкезите, народ од кавкаските планини, а усвоен е од царската отоманска кујна.
Ова „кралско јадење“ обично се подготвува како главно јадење, но многу е погодно да се служи и како предјадење или како мезе.
Черкеското пилешко е одлично јадење од парчиња пилешко во кремаст сос од ореви и леб, а како здраво јадење без мрсни додатоци е одличен предлог за лесен ручек со зелена салата, варен зеленчук и тост леб. Можете да го искористите и како фил за сендвичи.
Состојки:
– 1 цело пиле или две поголеми пилешки гради
– 1 главица среден кромид
– 1/2 лажичка бибер во зрна
– 5 чаши вода
– моркови, целер, пашканат по желба
За основата:
– 300 гр крупно мелени ореви
– 2 чешниња лук
– 4 парчиња бајат леб (средината без кора)
– 1,5 чаша пилешка супа
– 1 лажичка сол
– половина лажичка коријандер во прав
За посипување (по желба):
– 2 лажици маслиново масло
– 1 лажичка мелена црвена пиперка
Подготовка:
Во тенџере ставете ги градите или пилешкото исечено на парчиња, прелијте со вода, додадете ги кромидот, целерот и зрната бибер. Гответе на средна топлина додека месото не омекне.
Вареното месо процедете го и оставете го да се излади. Потоа, месото одвојте го од коските и со рака исечете го на ленти.
Во подлабок сад ставете ги коцките бајат леб па прелијте ги со водата во која е варено пилешкото, додадете ги изгмечениот лук, оревите, зачините и сечканото месо, па убаво соединете.
Пилешкото префрлете го во сад за сервирање. Посебно загрејте го маслиновото масло и во него додадете ја црвената пиперка, па со тоа прелијте го пилешкото. Украсете со магдонос. Може да се сервира и топло и ладно, како предјадење или главно јадење.